Државниот завод за статистика го одложи објавувањето на податоците за стапката на раст на Брутодомашниот производ (БДП) во првите три месеци годинава, податок кој според календарот требаше да биде објавен на 2 јуни годинава. Нема образложение поради што се пролонгира објавата на овој статистички податок, ниту пак има информација кога ќе се случи тоа.
А каков перформанс има домашната економија оваа година? Во услови на глобална криза поради недостиг на базични суровини, а во време на воен конфликт во Украина, повеќето инпути за домашниот БДП се во надолни очекувања. Народната банка овој мај објави дека тековните согледувања за растот на македонската економија се понеповолни во однос на октомвриските оценки. Имено, и оваа, и следната година, се очекува побавен раст на македонската економија отколку во 2021 година. Според прогнозата, годинава растот треба да е 2,9 проценти, по што ќе следи раст од 3,6 проценти во 2023 година.
„И натаму се очекува позитивен, но поумерен придонес од домашната побарувачката, главно поради послабиот придонес од потрошувачката на домаќинствата, додека нето-извозот ќе има негативен придонес. На среден рок, се очекува задржување на солидниот економски раст, со реална стапка од 4 отсто во 2024 година што е во согласност со октомвриските оценки, оцени Народната банка соопштувајќи ги мајските проекции.
Македонската економија порасна во 2021 година со стапка на раст од 4 проценти, додека во 2020 година стапката на раст на БДП беше негативна односно регистриран беше пад на домашната економија од 6,1 процент.
Во апсолутни бројки, а поради пандемијата на Ковид, Северна Македонија во 2020 година оствари загуба од 760 милиони евра, колку што е всушност изгубениот раст 6,1 процент. Растот од 4 проценти во 2021 година, беше недоволен да се надомести загубата. Така на крајот од 2021 година, Северна Македонија имаше нето загуба во БДП од 250 милиони евра, или заедно со изгубениот потенцијален раст (загубата во 2020 од просекот од последните пет години кој во пари изнесува точно 440 милиони евра), загуба од 690 милиони евра во однос на крајот од 2019 година.
.webp){kind=icon}
Во моментов нема коментари за веста. Биди прв да коментира...