Претставниците од бизнис-секторот велат дека фирмите веќе имаат сериозни проблеми со ликвидноста поради ковид, а потоа и енергетската криза, како и зголемените трошоци за производство. Сега веќе имаат проблем и со изворот за финансирање, кога станува збор за банкарскиот сектор, бидејќи кредитите се сѐ поскапи. Најавената даночна реформа ќе значи дополнително оптоварување за и онака кревките фирми. За ова се согласни и двајцата претставници на бизнис-заедниците што беа гости во Блумберг Адрија ТВ, Трајан Ангелоски, претседател на Сојузот на стопански комори (ССК), и Дрилон Исени, извршен директор на Стопанската комора на северозападна Македонија.
„Ако даночната реформа се воведе во оваа форма, тоа е стимулирање на и така веќе високата инфлација и доаѓаме во момент да се прашаме што е целта и што сакаме да постигнеме. Голем дел најавени даночни измени не се логични и не се гледа целта. Така што мислам дека во овој момент треба да се работи на неколку битни моменти. Тоа се енергетиката и бирократските процедури, поради кои на дневна база губиме огромни средства, бидејќи администрацијата долго работи на одредени услуги“, вели Трајан Ангелоски, претседател на ССК.
„Секое дополнително оптоварување на бизнисот во време на криза е негативно, бидејќи и онака нашите фирми имаат проблем со ликвидноста, а сега парите од банкарскиот сектор стануваат многу скапи и секако дека бизнисите ќе ретерираат во делот на капитални проекти, што значи помалку средства во оптек, помалку проекти, помалку работа и послаба економија. Собирањето средства по даночна база треба да се гледа и од аспект на сивата економија. Ги оптоварувате само тие фирми што работат легално, а пристапот треба да биде сосема обратно, односно треба да најдеме начин да ги натераме компаниите да работат легално и да се намали уделот на сивата економија“, вели Дрилон Исени, извршен директор на Стопанската комора на северозападна Македонија.
Во делот на владината поддршка за бизнисот во време на енергетска криза, бизнисмените сметаат дека што поскоро се потребни конкретни мерки за да се заштити бизнисот од сериозни последици.
„Трговците се само еден чинител во оваа состојба, Проблемот не е само до нив туку и до берзанските цени на прехранбените производи, високите цени на енергентите што се увезуваат. Нормално, ќе има милион оправдувања од владините претставници, но не се адекватни. Мислам дека треба да следуваат сериозни реконструкции и реформи. Досега немаше мерки за бизнисот во делот на енергетиката, ова би бил прв пакет мерки, зашто до овој момент ниту еден киловат-час не е пуштен во стопанството. Има најава дека од 1 декември одредени компании веќе имаат потпишано еднократни договори за поевтина струја, но тие не се потврдени. Се согласуваме дека со оваа пакет мерка со поевтина цена на струјата, ако им одговара на прехранбените индустрии, може да се очекува да се коригираат цените надолу, но тоа нема да биде веднаш, бидејќи фирмите имаат и други компоненти“, вели Ангелоски од ССК.
Бизнисмените велат дека енергетската криза, човечкиот капитал и финансиите се клучниот проблем во моментов.
„Нашето прашање до Владата е што да се прави со другите компоненти што учествуваат во формирањето на цената, како долгорочно да се влијае на нив и како да ги амортизираме на долг рок. Овие мерки даваат краткорочен ефект. Сега е време државата да му помогне на бизнисот, за да се зачуваат производствените капацитети. Секое нарушување на производствените капацитети значи враќање десет години наназад. Затоа мора долгорочно да се решат проблемите со енергетиката, да се видат алтернативите и да се процени дали фотоволтаиците се такво решение или гасификација со преструктурирање на производствените капацитети“, вели Дрилон Исени, извршен директор на Стопанската комора на северозападна Македонија.
Погледнете го видеото со целиот разговор со преставниците од двете стопански комори.
.webp){kind=icon}
