.webp){kind=icon}
Измените и дополнувања на законот за данок на добивка наместо да создадат услови за правично оданочување, ќе предизвикаат сериозен удар врз малите и микрофирми, но и стимулирање даночна евазија, реагираат од Сојузот на стопански комори.
„Многу сме изненадени од овој предлог-закон. Тоа е од причина што во 2020 година имавме зголемување на овој праг од два милиона на три милиони, при што компаниите што остваруваат промет до три милиони денари беа ослободени. Сега без никаква најава законот е директно даден во Собрание, што ќе значи дека се опфаќаат токму оние што се најранливи, особено во текот на оваа енергетска криза, на зголемени инфлаторни движења, и ќе влезат во системот на оданочување. Тоа е сериозен удар врз овие мали семејни компании и апелираме предлог-законот да се повлече“, рече Габриела Кулебанова, потпретседателка на Сојузот на стопански комори, во гостувањето на Блумберг Адрија ТВ.
Прочитајте повеќе: Занаетчиите реагираат на предлог-измените на Законот за данок на добивка
Според неа, доколку ваквите измени бидат усвоени, нема време за никакво приспособување, бидејќи ќе стапат во сила од 1 јануари.
„Тоа би значело одење во еден спротивен правец на даночна евазија, отпуштање вработени или влегување во сивата економија. Малите компании се битна алка од целиот економски систем, па се плашиме дека ова нема да биде добро за подем на економијата во овој момент“, нагласи Кулебанова.
