Велосипедот како симбол на развој - пет вести на денот

Планирањето на летувањата одамна веќе не е само прашање на слободни денови и организација, туку сериозна ставка во буџетот, дури и за побогатиот дел од населението.

Во овој дух, се роди глобалниот феномен „destination dup“, што значи избор на помалку популарни, но слични и значително подостапни дестинации. На пример, наместо да поминете една недела на Хаваи, можете да уживате во португалските Азори.

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Во развиените земји секој жител има велосипед, а во Македонија?

Македонија значително заостанува зад Европа кога станува збор за секојдневното користење велосипеди и тротинети наспроти моторни возила. Последните податоци за велосипеди од Евростат и национални анкети, како и бројки со кои располагаат некои здруженија на велосипедисти (кои главно се однесуваат на 2022 или 2023 година), покажуваат дека Холандија, Германија и Данска се лидери во однос на користењето велосипеди како превозно средство. 

Ако во Холандија на 1.000 жители има 1.310 велосипеди, во Данска и Германија таа бројка се движи меѓу 900 и 990, што значи дека речиси секој жител има велосипед. Изненадувачки добро котира и Полска, каде што на 1.000 жители има околу 700 велосипеди, а нешто помалку моторни возила (околу 670).

Забревтан раст на инфлацијата

Индексот на трошоците на животот во јуни 2025 година во однос на јуни 2024 година, бележи зголемување од 4,5 проценти, а индексот на цените на мало бележи зголемување од 3,7 проценти, соопшти Државниот завод за статистика.

Оттаму додаваат дека инфлацијата мерена преку индексот на трошоците на животот во јуни 2025 година во однос на мај 2025 година, изнесува 0,8 проценти.

Повисоката инфлација во јуни 2025 година, во однос на мај 2025 година, е резултат на зголемувањето на трошоците на животот во следните групи: транспорт за 2,9 проценти, рекреација и култура, храна и безалкохолни пијалаци за 1,1 процент, разновидни стоки и услуги (0,9 проценти), мебел, покуќнина и одржување на домаќинствата (0,8 проценти) , ресторани и хотели (0,5 проценти), здравје (0,3 проценти), комуникации, облека и обувки (0,2 процент) и домување, вода, електрика, гас и други горива (0,1 процент).

Колку „тежи“ фитнес индустријата и кои се новите трендови?

Фитнес индустријата влезе во 2025 година со силен замаец надградувајќи се врз годините на раст и трансформација. По пандемиските нарушувања и инфлаторните притисоци, 2024 година означи враќање кон оперативна нормализација и стратешка еволуција. Наместо да се вратат на старите навики, корисниците го дефинираа фитнесот поинаку - тие прифатија поширока визија за здравјето што комбинира ментална хармонија, физичка активност, закрепнување и оптимизација на животниот стил. 

Какво е влијанието на промената на навиките на луѓето и свртувањето кон здрав живот, покажуваат и иницијативите преземени од компаниите кои традиционално се занимаваат со производство на алкохолни производи, особено пиварниците - тие го проширија своето портфолио со производи без алкохол.

Блаж Бродњак и НЛБ во ново преземање?

Минува една година откако најголемата словенечка банка НЛБ (NLB) се обиде да ја преземе австриската „Адико“ (Addiko Bank), со што сакаше повторно да влезе на хрватскиот банкарски пазар. Плановите пропаднаа, но амбициите за спојувања и преземања останаа. На крајот, сепак, влегоа на хрватскиот пазар преку лизинг-услуги – со преземање на групацијата „Самит лизинг“ (Summit Leasing).

Претседателот на НЛБ, Блаж Бродњак, не ги крие амбициите за нови преземања, но не по секоја цена. Дали повторно ќе се обидат да ја преземат „Адико“?

Дали е време за брикскоин?

Со години земјите од БРИКС го зголемуваат бројот на билатерални економски договори што ја зајакнуваат трговијата со национални валути. Украинската војна и санкциите ги охрабрија членовите да воспостават алтернативи на меѓународниот систем за финансиски пораки СВИФТ (SWIFT), како што се прекуграничниот меѓубанкарски систем за плаќања на Кина базиран на јуан, рускиот систем СПФС (SPFS) и бразилскиот Пикс (Pix). Од март 2024 година групата исто така започна со планирање дигитална мрежа за плаќања што би работела врз основа на криптовалути.

Но целта за стекнување независност од репресијата на доларот со воведување сопствена валута сè уште не е постигната. Најважен дел од плановите би бил развојот на резервна валута базирана на блокчејн-технологија.

Децентрализирана и дигитализирана валута би била привлечно средство за реализација на идејата за мултиполарен поредок, каде што ниедна земја - и валута - нема одлучувачка или доминантна улога. Тоа би ја ограничило доминацијата на кој било од членовите, особено Кина, која има најамбициозни планови со јуанот како резервна валута.