.webp){kind=icon}
Државниот завод за статистика го објави статистичкиот атлас во кој се презентирани податоци од Пописот 2021, кои меѓудругото покажуваат во кои делови од Македонија има најизразено намалување на населението, а во кои има зголемување. Пописот покажа дека во Македонија живеат 1.836.713 жители, што е намалување за 185.834 жители или 9,2 проценти во однос на 2002 година.
Пораст на бројот на населението е забележан само во 13 општини од вкупно 80 општини, од кои 7 се општини што се дел од Град Скопје.
„Во апсолутни износи, најголемо намалување на населението има во општините Гостивар (-21.272) и Кичево (-17.065), додека зголемувањето e најголемо во општините Аеродром (+5.726) и Кисела Вода (+4.729). Процентуално, најголемо намалување на населението е евидентирано во општините Центар Жупа (-42,9 проценти) и Маврово и Ростуше (-41,5 проценти), а најголемо процентуално зголемување на населението има во општините Студеничани (+27,4 проценти) и Сопиште (+18,7 проценти)“, соопшти ДЗС.
Општини со најмногу население се општините: Куманово со 98.104 жители, Битола со 85.164 и Тетово со 84.770 жители, а општини со најмалку население се општините Зрновци со 2.086 жители, Лозово со 2.264 и Вевчани со 2.359 жители.
Во Македонија доминира урбаното население (население што живее во градовите) со вкупно 1.131.356 жители (или 61,6 проценти), додека во руралните средини живеат 705.357 жители (или 38,4 проценти). На ниво на општини, населението што живее во рурални средини е разместено во речиси сите општини, со исклучок на две општини во Град Скопје кои немаат рурално население (Центар и Чаир), додека во 37 општини воопшто нема урбано население.
„Урбано население е евидентирано во вкупно 43 општини, од кои во 38 доминира урбаното население со учество од над 50 проценти во вкупното население во општината, а надвор од територијата на Град Скопје, најголемо учество на урбано население има во Општина Штип (93,6 проценти). Од друга страна, во 205 населени места со рурален карактер се забележува целосна депопулација“, информира ДЗС.
