Македонските граѓани за задоволување на основните потреби за храна и пијалаци трошат трипати повеќе од своите семејни буџети отколку граѓаните на Европската Унија. Според новите податоци на Евростат, најголема ставка од 25 проценти во расходите на домаќинствата од ЕУ во 2021 година биле трошоците за станарина, вода, електрична енергија, гас и други горива, односно таканаречените комунални или режиски трошоци. Втора по големина е ставката за храна и безалкохолни пијалаци, која опфаќала 14,3 проценти од вкупните расходи на просечното европско семејство.
Од друга страна, податоците на Државниот завод за статистика (ДЗС) покажуваат дека дури 47,1 проценти од семејниот буџет на едно просечно македонско домаќинство во 2021 година се трошеле за задоволување на потребите за храна и безалкохолни пијалаци, а трошоците за домување опфаќале 10,9 проценти од вкупните расходи.
Колку појужно, толку потажно
Вкрстувањето на податоците од Македонија со оние од Евростат и од српскиот Републички завод за статистика за структурата на потрошувачката на домаќинствата од регионот Адрија покажуваат дека српската изрека „колку појужно, толку потажно“ сè уште е актуелна на овие простори кога станува збор за животниот стандард на населението.
Имено, Србите се веднаш зад Македонците по висината на расходите што се одвојуваат од семејниот буџет за храна и безалкохолни пијалаци, потоа следуваат Хрватите, а кај Словенците оваа категорија на расходи е дури на третото место.
Забележително е дека граѓаните во земјите од регионот Адрија што се членки на Европската Унија одвојуваат многу поголем процент од вкупните семејни расходи за рекреација и култура. Во Македонија за таа намена во 2021 година се трошеле само 1,4 процент од вкупните расходи на едно домаќинство.
Најмногу поскапе токму храната
Државниот завод за статистика завчера соопшти дека просечната стапка на инфлација во Македонија за цела 2022 година изнесува 14,2 проценти, што најверојатно ќе биде забележано како европски рекорд откако ќе бидат објавени годишните податоци за инфлациските движења во земјите од Унијата.
Според ДЗС, најголеми поскапувања лани имало во категориите: храна и безалкохолни пијалаци за 20,9 проценти, транспорт за 19,5 проценти, ресторани и хотели за 15,5 проценти, домување, вода, електрика, гас и други горива за 13,3 проценти, како и кај разновидните стоки и услуги за 8,9 проценти.
Човек не треба да е нобеловец за да заклучи дека податоците за структурата на расходите на македонските домаќинства за 2022 година, кои допрва треба да се објават, најверојатно ќе покажат ново зголемување на трошоците за храна и за безалкохолни пијалаци. „Блумберг Адрија“ веќе пишуваше дека порастот на просечната плата не е доволен да се покрие зголемувањето на цените на основите производи и услуги во изминатиов период, што ќе резултира со дополнително влошување на животниот стандард на граѓаните.
.webp){kind=icon}