Ние купуваме станови во Солун и Криопиги, гастарбајтери кај нас

Куќи во Неа Плагија, Неа Мудања, Каликратија, апартмани во Солун, хотели на грчките плажи по цени слични како во Скопје. Страниците со огласи се полни со понуди за продажба на недвижности на блиското грчко крајбрежје.

„Блумберг Адрија“ побара информации од овие огласувачи. Велат дека како се наближува сезоната, така заинтересираноста на Македонците за купување недвижности на море, особено во Грција, се зголемува. Особено што цените за квадратен метар на Халкидики не се многу различни од тие во скопските населби. Огласите не стојат долго отворени, купувачи има.

Конкретни бројки колку Македонци поседуваат имоти во Грција нема, но бројката се зголемува од година на година. Расте бројот и на граѓани од земјава што купуваат имоти во Албанија, исто така на море. Лани беше објавено дека 45 Македонци поседуваат имоти и во Дубаи.

Овој тренд го следат и домашните градежни компании, кои полека го селат бизнисот во соседните земји. Најатрактивни за нив се туристичките дестинации - грчкото приморје и српските планини.

Златибор – атрактивен за македонските градежни компании

Градежната компанија „Адора“ е една од првите домашни фирми што тргнаа да ги освојуваат грчките плажи. Престана со деловни активности во земјава уште во 2019 година и почна со градба на апартмани на Тасос, кои сега се изнајмуваат. Инвестираше и во Криопиги, уште едно од омилените места на Македонците за одмор. Сега „Адора“ гради станови во Солун.

Заменик-претседателот на „Aдора бизнис груп“, Душко Чифлиганец, во изјава за „Блумберг Адрија“ вели дека во моментов најголем дел од активностите, освен кон Грција, е насочен и кон Србија – во Златибор.

„Станува збор за неколку проекти од различна природа, концепт и обем. Најголемата инвестиција во овој момент ја имаме во Србија, а станува збор за проект од 25 милиони евра економска реализација во двете насоки“, вели тој.

Душко Чифлиганец / Приватна архива

Компанијата веќе не работи на домашниот пазар поради, како што вели, институционалната неефективност од страна на локалните власти и таканаречениот мораториум во Општина Центар. Во вакви услови, активностите ги насочиле кон соседните земји, каде што, според Чифлиганец, дејствувањето е полесно, а цените повисоки.

„Цените на недвижностите во регионот пораснаа значително и подрастично споредено со Македонија, што за мене воопшто не е факт за изненадување кога ќе се земат предвид сите тешкотии со кои се соочивме во изминатиот период, како што беа ковид-19, конфликтот во Украина, сеопфатната инфлација, која енормно беше изразена кај градежните материјали и работната рака. Условите на соседните пазари се значајно различни речиси во сите аспекти споредено со нашата држава. Целокупното ценовно ниво е повисоко, цената на чинење на градбата е значително повисока, а уште повеќе цената на станбениот квадрат е повисока, движејќи се од 2.500 до 5.000 евра за квадратен метар во проектите на ’Адора’“, објаснува Чифлиганец.

Тој вели дека постои разлика и во начинот на кој се финансираат градбите во странство.

„Во Македонија купувачите во најголем дел ја финансираат недвижноста преку кредит, додека во Србија и во Грција повеќе се оди на купување со сопствени средства, што, земајќи ја предвид моменталната ситуација на пазарите на капитал, води до значајна разлика при работењето. Купувачите се најчесто луѓе што имаат слободни средства и ги инвестираат во недвижности со цел да ги заштитат од инфлацијата, што за купувачите се покажа не само соодветно туку и профитабилно“, вели Чифлиганец.

Дваесет отсто од купувачите на македонскиот пазар се странци

Цените на недвижностите во земјава лани се зголемија за над 20 отсто, но од последниот квартал лани е забележано стабилизирање на цените.

Иако недвижностите во Македонија никогаш не биле поскапи, интерес за купување има. Ова важи особено за новите атрактивни комплекси што се градат во центарот на Скопје.

Еден од нив е комплексот „Дајмонд оф Скопје“, кој го гради турски „Лимак“. Тој  се протега на површина од 325.000 квадратни метри, има четири станбени кули, со вкупно 772 станбени единици. 

 

„Лимак“

Од компанијата за „Блумберг Адрија“ велат дека 20 отсто од купувачите се странци. Главно станува збор за луѓе од дијаспората, родени во странство.

„Меѓу купувачите од други земји има од Словенија, Швајцарија, Холандија, САД, Турција и др. Според досегашната структура на продадени станови, странците ги претпочитаат апартманите со поголема квадратура на повисоките катови. Растот на цената не го промени интересот кај купувачите и тој се движи на исто ниво“, ни одговорија од турската компанија.

 

 

 

Во моментов нема коментари за веста. Биди прв да коментира...

Остави коментар