Каков стан можете да купите за 100.000 евра во Македонија?

Стан во Мичурин, блиску до скопската железничка станица, од 44 квадрати се продава за 95.000 евра. Зградата се очекува да биде готова за еден месец. Овој оглас беше хит на социјалните мрежи викендов и, според истражувањето што го направи редакцијата на „Блумберг Адрија“, со 2.159 евра за квадратен метар е еден од најскапите даден на продажба во моментов.

Анализираме каков стан можете да купите за 100.000 евра, дали стар или нов, со колкава квадратура, во која населба. Освен во Скопје, ги анализираме и цените на становите во Битола, Охрид, Тетово, Штип и Гевгелија. Со оглед на тоа што во Македонија нема институција што ги објавува на редовна база просечните цени на недвижностите, како што на пример е случај во земјите од регионот, податоците ги собравме од огласи. Секако, се консултиравме и со агенти за недвижности, кои велат дека цените од огласите не варираат многу во реалноста и во купопродажните договори. Факт е дека она што сега може да се купи за одредена сума, значеше многу поголема недвижност пред неколку години.

Во Скопје за 100.000 евра може да се најде и стан од педесетина квадрати, но и од 115 квадратни метри - сѐ зависи од локацијата.

Најскап е просторот во Центар, а блиски се цените и на новите градби во Карпош, Аеродром и Кисела Вода. Новите станови во Охрид имаат слични цени како во Скопје, а најевтините станови од градовите што ги споредувавме се продаваат во Штип, во источна Македонија.

Скопје

Во скопски Центар со 100.000 евра може да се купи стан од 50 квадрати во Капиштец, или шеесетина квадрати во Буњаковец. Овие цени се за нови станови. Цените за старите станови се движат од 1.300 до 1.500 евра за квадратен метар.

Во Карпош 1 за 100.000 евра може да се купи стан од околу 68 квадрати и како се оди кон запад така цената се намалува. Во Карпош 2 за новоградба квадратот чини 1.400 евра, во Карпош 4 за 100.000 евра може да се купат околу 90 квадрати, но стара градба.

Понатаму на запад, за 100.000 евра може да се купат станови од 80 квадрати во Хром и Влае, новоградби.

На другата страна на Скопје, во Аеродром, за анализираната сума може да се купи стар стан од околу 75 квадрати или новоградба со десетина квадрати помалку. Во населбата Ново Лисиче, во општината Аеродром, квадратен метар изнесува 1.200 евра во новоградба.

Во Кисела Вода со оваа сума може да испазарите 90 квадрати стан во стара зграда или 70 квадрати во нова.

Во Автокоманда за 100.000 евра има станови од стотина квадрати, а во Чаир и по 115 квадрати.

Охрид

Градот крај езеро со цените на становите сериозно му конкурира на главниот град. Во огласите што ги анализиравме наидовме на стари станови, на пет минути од шеталиштето, кои се продаваат по цена од 1.300 евра за квадрат. За 100.000 евра на слична локација во новоградба во Охрид може да се купи стан од околу 60 квадрати.

Во огласите има и луксузни апартмани на кејот, крај езерото, кои чинат по 100.000 евра а имаат по 35 квадрати.

Depositphotos

Битола

По Охрид, следен на листата градови по најскап квадратен метар е Битола. За 100.000 евра во центарот на градот на конзулите може да се купи комотен стан од 105 квадратни метри. Новите градби се продаваат по околу 900 евра за квадрат, а луксузни станови во градба се нудат и за 1.100 евра за квадратен метар во центарот на градот. Стари станови, подалеку од централното градско подрачје, има и по 750 евра за квадрат.

Гевгелија

Цени до 1.000 евра за квадратен метар има и во новоградби во Гевгелија, која поради близината на граничниот премин Богородица кон Грција, стана актуелна и скапа во последните години. Во центарот на градот за 100.000 евра може да се најде стан од 100 квадрати. Во градба, карабина, се продава по 850 евра за квадрат, а стар стан подалеку од центарот има и за 600 евра.

Тетово

Новите станови во центарот на Тетово се доближуваат до 1.000 евра за квадратен метар. Во центарот на градот, новите станови во моментов се нудат по 950 евра за квадрат, а за 100.000 евра во населбите подалеку од центарот може да се купат и над 120 квадрати.

Штип

Најевтини станови во нашата анализа има во Штип. Во новоградба во градот под Исарот за 100.000 евра може да се купи стан од околу 130 квадратни метри. Сепак, и во штипските огласи наидовме на цени што во центарот на градот достигнуваат и до 1.000 евра за квадратен метар.

Официјален податок колку чини квадратен метар во земјава - нема. Тие податоци своевремено ги објавуваше катастарот, но последен пат тоа го направил во третиот квартал во 2020 година.

Според НБРМ, пак, цените на становите најбрз раст забележаа во третиот квартал лани, од 21, 2 отсто, а во последниот квартал растот изнесуваше 20,6 отсто.

Од земјите во регионот Адрија, само Босна и Херцеговина има побрз раст на цените на становите од земјава, а прогнозите на аналитичкиот тим на „Блумберг Адрија“ се дека цените годинава ќе се намалат.

„Перцепцијата за општа економска несигурност во 2023 година ќе ги одложи одлуките за купување недвижности и ќе влијае на намалување на побарувачката, што на крајот на 2023 година ќе резултира со намалување на цените на недвижностите во регионот Адрија за околу 10 проценти во споредба со просекот од 2022 година“, наведуваат нашите аналитичари.

Во моментов нема коментари за веста. Биди прв да коментира...

Остави коментар