Директорите на авиокомпаниите и аеродромите ги поминаа изминативе две години обидувајќи се да ги убедат сите дека е безбедно да се лета за време на пандемија, промовирајќи пунктови за намален контакт и медицински филтри. Но, она што не го знаеја е колку ќе бидат преоптоварени кога патувањата ќе се вратат.
Од Сиднеј, каде што патниците чекаат со часови за да се пријават, до хаотични сцени во Индија и Европа, каде што во Велика Британија се забележани недели на прекин, а „Луфтханза“ (Deutsche Lufthansa AG) откажува стотици летови, воздухопловната индустрија нема ни приближно доволно луѓе за да работи непречено, иако побарувачката за патувања по летото е сè уште нејасна.
Како што земјите повторно ги отвораат границите и се укинуваат ковид-ограничувањата, патувањата се вратија со толкав интензитет што тоа резултира со невиден притисок врз работната сила, која и онака е погодена поради отпуштањата на стотици илјади работници, од пилоти до кабински екипаж, предизвикани од пандемијата. Многумина не се расположени да се вратат, но дури и да се, зголемувањето со такво темпо е ризик за авиокомпаниите и аеродромите, при што спиралната инфлација и економските притисоци ставаат знак прашалник за тоа колку навистина е одржлива сегашната побарувачка.
„Сите аеродроми и авиокомпании во моментот се со скратен персонал“, вели Џеф Калберт, главен извршен директор на аеродромот во Сиднеј, каде што речиси половина од работната сила од 33.000 ги загубија своите работни места за време на пандемијата.
„Аеродромот жестоко се обидува да го обнови своето делување, но не сме толку привлечно место за работа како порано“, нагласува тој, додавајќи дека сè уште постои елемент на загриженост околу сигурноста на работата.
Како продолжување на неволјите за патниците, аеродромите „Шипхол“ во Амстердам и „Гетвик“ во Лондон планираат да го ограничат бројот на патници за време на шпицот на летната сезона поради недостиг на персонал.
Откако ги загубија своите работни места поради пандемијата, многу вработени во воздухопловниот сектор се префрлија на други, помалку нестабилни кариери, па да се вратат на претходната работа станува сè потешко. Аеродромот Чанги во Сингапур бара 6.600 работници, од обезбедување, до персонал во угостителството. Една групација, „Цертис Груп“ (Certis Group), нуди бонус за пријавување од 18.000 американски долари, околу 10 пати повеќе од основната месечна плата, за улога на редар кој ќе помогне во протокот и контролата на метежот.
Bloomberg
Големиот недостиг на персонал, кој сигурно ќе биде тема на дискусија на 78-от годишен генерален состанок на Меѓународната асоцијација за воздушен транспорт што започнува во Доха в недела, доведе до одложувања, откажувања и екстремна фрустрација и за авиокомпаниите и за патниците ширум светот. Ситуацијата стана толку лоша што главниот извршен директор на „Рајанер холдингс“ (Ryanair Holdings Plc), Мајкл О’Лири повика на помош од британскиот воен персонал, а австралиската „Кантас“ (Qantas Airways Ltd) побара од вработените во канцелариите да работат како волонтери на аеродром за време на јулскиот период на одмори.
„Недостигот на персонал значи дека се бориме да го балансираме планираниот распоред со квалитетот и точноста што ги ветуваме“, посочи Јенс Ритер, извршен директор на главната германска авиокомпанија „Луфтханза“, во објава на „Линкдин“ минатата недела, извинувајќи се за откажаните летови во Минхен и Франкфурт.
„Многу луѓе го напуштија воздухопловниот сектор за време на пандемијата и најдоа работа на друго место. Сега, нашите системски партнери, како што се аеродромите и угостителите, се соочуваат со сериозен недостиг на персонал и се борат да вработат нов персонал“.
Како авиокомпаниите и аеродромите го менаџираат овој проблем зависи од регион до регион.
„Во Азија, аеродромите обично се поактивни кога станува збор за избегнување на колапс, понекогаш не дозволувајќи им на авиокомпаниите да додаваат нови летови или барајќи од нив да ги презакажат“, вели Брендан Соби, основач на консултантската компанија „Соби авиејшн“ (Sobie Aviation) со седиште во Сингапур. Другите делови од светот само се надеваат дека ќе земат здив кога побарувачката ќе забави, па дури и почне да опаѓа.
Од друга страна, тоа е и главната загриженост зад притисокот да се вработи повеќе персонал. Тогаш авиокомпаниите би можеле да се соочат со проблем на прекумерна вработеност, и во однос на флотата и работната сила, ако авионите одново бидат приземјени и летовите ставени во мирување. Авионските билети се веќе далеку поскапи за повеќето патници, инфлацијата насекаде ги зголемува животните трошоци и постои дефинитивна можност луѓето да претпочитаат да останат дома и да одмараат во своите домови штом ќе заврши почетната еуфорија.
„По врвот на патувања во северната хемисфера од јуни до август, комбинацијата од забрзано враќање на училиште и работа и нормалниот сезонски пад на побарувачката ќе ги принуди авиопревозниците да ги релаксираат цените за одмор и бизнис патувања или ќе ризикуваат дополнително уништување на побарувачката“, вели Роберт Ман, шеф на консултантската компанија за авијација со седиште во Њујорк, „Р.В. Ман енд Ко.“ (R.W. Mann & Co).
.webp){kind=icon}
Во моментов нема коментари за веста. Биди прв да коментира...