Платите и натаму се топ тема во земјава. Не само затоа што овој месец функционерите се офајдија со 78 отсто зголемување туку и затоа што просечната плата за март стигна до 35.000. Е, сега, замислете колку ќе изнесува просечната плата за април, кога во просекот ќе влезат зголемените примања на оние 1.060 функционери.
Но работниците остануваат незадоволни и покрај поволната статистика, па сега ќе бараат спас преку Отворен Балкан. Имено, од почетокот на летото стартува единствениот пазар на трудот во Македонија, Србија и Албанија, што значи дека Македонците ќе можат да работат во другите две земји без работна дозвола. Тоа може да значи дека работната сила во земјава дополнително ќе се намалува, затоа што платите, на пример во Белград или во Војводина, се за 300-400 евра повисоки од тука.
Кога има сè, може сè. Рекордно високите цени на горивата лани не беа пречка Македонците да возат повеќе од обично. Податоците покажуваат дека увозот на нафтени деривати се зголемил за над 20 отсто.
Токму цените на енергентите беа причина за високата инфлација лани. Експертите сега гледаат забавување, очекуваат дека до крајот на годината инфлацијата може да стане едноцифрена, но и натаму има предизвици. Дел од тие предизвици, според аналитичарите на „Блумберг Адрија“, се цените на храната и растот на платите. Предизвик повеќе за инфлацијата се банките во земјава, кои бавно се приспособуваат кон мерките на НБРМ и бавно ги зголемуваат каматите.
Неделава објавивме и интервју со новиот директор на ЕСМ, Васко Стефанов. Тој кажа дека лани Владата ѝ префрлила на државната компанија 177 милиони евра за полесно справување со енергетската криза, а по подолго време ЕСМ оствари и добивка во работењето. Дали добивката ќе биде мотив компанијата да врати дел од парите во централниот буџет, останува мистерија. Исто како што останува мистерија зошто 70 отсто од корисниците немаат склучено договори со скопски „Водовод“.
.webp){kind=icon}
