За две недели отсега ќе важи новата цена на струјата за домаќинствата во земјава. Досега е јасно само дека ќе се врати евтината тарифа, а дали ќе има поскапување или не, Регулаторната комисија за енергетика сè уште пресметува. Кога ќе стигнат новите сметки, сеедно дали ќе бидат исти или повисоки, ценкање нема. Тие мора да се платат.
Добро утро. Еве кои пет работи треба да ги знаете за почеток на овој последен работен ден во неделата.
ЕЦБ ја крена каматата на највисоко ниво во последните две децении
Помалку од еден ден откако Федералните резерви (ФЕД) ги оставија трошоците за задолжување непроменети по 10 постојани зголемувања, ЕЦБ ја зголеми стапката на депозити на 3,5 отсто - највисоко ниво во повеќе од две децении и во согласност со очекувањата на економистите и трговците.
„Идните одлуки ќе бидат во насока на тоа клучните каматни стапки на ЕЦБ да се доведат до нивоа доволно рестриктивни за да се постигне навремено враќање на инфлацијата до среднорочната цел од 2 отсто и ќе се задржат на тие нивоа онолку долго колку што е потребно“, се наведува во денешното соопштение на Управниот совет.
Bloomberg
Бислимоски е против зголемување на цената на струјата
Доколку се прифатат барањата на енергетските компании што веќе доставиле свои предлози до Регулаторната комисија за енергетика, цената на електричната енергија ќе се зголеми за околу 13 отсто. Ова го истакна во интервју за „Блумберг Адрија“ Марко Бислимоски, претседателот на Регулаторната комисија за енергетика, но вели дека тој е против нагорна корекција на цените.
„Во овој момент ги анализираме податоците што ни ги доставија, во своите барања имаат наведено дека сакаат да им се зголеми цената за вршење на нивните енергетски дејности. Според она што го гледам првично, не гледам дека има толкав простор за зголемување на нивните цени што ги бараат, така што не верувам дека ќе има некое поместување на цената на електричната енергија како што бараат овие компании. Јас сум против зголемување на цената на електричната енергија во овој момент“, вели Бислимоски.
Како се ценкаме на Балканот?
Договарањето бара и продавачот и купувачот да ја прифатат играта. Во ерата на трговски центри, се чини дека само пазарите и нелегалните продавачи ја одржуваат културата на ценкање (пазар за цената). Во потрага по попусти во продавници, „Блумберг бизнисвик Адрија“ истражуваше како изгледа да се испазариш за цена во Босна и Херцеговина, Северна Македонија и Србија.
„На продавачот му велиш дека е многу убаво и дека баш такво бараш, но дека ти е скапо. Всушност воопшто не почнувај да се ценкаш за нешто што не ни сакаш да го купиш. Продавачот веднаш го препознава тоа и нема да влезе во ’пазарот’. Мора да ти треба тоа за кое ќе се пазариш. Бараш да го спушти малку. Најдобро е да бидеш фер и ти како купувач. Сум успеал да добијам и до третина од првичната цена. Секако, сега повеќе купувам храна на пазар и успевам да се испазарам во смисла ситуацијата да биде вин-вин. Јас да купам повеќе од производот, ама да добијам пониска цена“, вели Станче М. од Скопје, лице што сака, но и успешно се ценка.
Каде на одмор?
Плажа, езеро или море, активностите и рекреацијата на вода никогаш нема да излезат од мода, но одморите одамна станаа нешто повеќе од само „печење на сонце“. Луѓето сè повеќе се „гладни“ за невообичаен одмор, за алтернативни дестинации, за нови активности и поинакви уживања.
Според директорот на Агенцијата за промоција и поддршка на туризмот, Љупчо Јаневски, новата туристичка реалност по пандемијата значително ги измени интересот и фокусот на туристите кон зелениот концепт со одржливост на дестинациите, одговорното патување и сè поголемиот фокус и интерес кон спа-туризмот и грижата за своето здравје.
Приватна архива
„Гугл“ промовира три македонски апликации со значајно влијание врз околината
Во рамките на европската кампања „Виарплеј“ (#WeArePlay) за иновации што имаат корисно влијание врз околината, „Гугл плеј“ (Google Play) одбра три македонски стартапи чии апликации се дел од неговата понуда. Станува збор за „Челинџер“ (Challenger) на компанијата „Грин ај-ти“ (GreenIT), „Еркеар“ (AirCare) и „Сноубол гејмс“ (SnowballGames).
Целта на кампањата на „Гугл“ е да ги промовира и да ги стави во центарот на вниманието европските бизниси што создаваат влијателни апликации и игри, истакнувајќи ги иновативните лидери на таа сцена од секоја земја, а што се присутни на платформата „Гугл плеј“.
.webp){kind=icon}
