Над 66 отсто од полуматурантите се запишале во средно стручно училиште

Од тројца полуматуранти, двајца се запишале во средно стручно училиште. Ова го покажуваат резултатите од уписите во средните училишта. Стопанската комора на Македонија соопшти дека овој факт е реална потврда за напорите што ги прави бизнис-секторот во последните години.

„Изминатата недела беа објавени резултатите од првиот рок на уписите на учениците во средното образование, кои покажаа дека речиси две третини се запишале во стручното образование, односно од вкупно 15.481 запишан ученик во учебната 2023/2024 година, 10.277 ученици или 66,4 отсто во стручно образование, додека 4.603 ученици или 29,7 отсто во гимназиско образование. Мал процент, околу 3,8 отсто, отпаѓа на ученици запишани во уметничкото образование и спортската гимназија“, пишува во соопштението.

„Уште од 2007 година претседателот на Стопанската комора, Бранко Азески, укажува дека образовниот и бизнис-секторот не смеат да бидат два одвоени света, туку образованието мора да ги следи потребите и трендовите на економијата и затоа се потребни реформски зафати за подобрување на квалитетот во образованието за да може да испорачува кадри потковани со добро знаење и вештини, кадри што ќе бидат компатибилни на пазарот на трудот, а најефикасна реформа за обезбедување стручен кадар е воведување на дуалното образование со нов пристап во наставата и ориентираност кон вештините и компетенциите, поткрепени со практичната обука на реално работно место“, соопшти СКМ.

Промоцијата на дуалното образование почна во 2007 година, а активностите се интензивираа во 2019 година. Целта што ја постави комората за упис на ученици во стручното образование беше 70 отсто.

„И резултатот е видлив. Зголемена е бројката на компании вклучени во стручното образование, од 11 компании во учебната 2019/2020 година на 500 компании во учебната 2022/2023 година, со тенденција бројот да расте. Зголемена е бројката на стручни училишта вклучени во дуалното образование, од седум  училишта во учебната 2019/2020 година, на 61 средно стручно училиште во учебната 2022/2023 година“, велат од комората.

Активностите на бизнис-секторот ќе останат насочени кон финансиска поддршка на стручното образование и обука.

„Комората и Коморскиот инвестициски форум на шесте земји од Западен Балкан, преку Германската банка за инвестиции (KFW), обезбедија финансиски средства за модернизација со машини и опрема во висина од 150.000 до 600.000 евра на конзорциуми составени од училишта/факултети и компании за реализација на дуалниот модел на образование. На првиот повик се обезбедени 3,4 милиони евра за  осум конзорциуми (седум стручни училишта и еден факултет, кои имаат потпишано договор со 29 компании), а на вториот повик се обезбедени 2,72 милиони евра за шест конзорциуми од нашата земја (37 компании со  четири стручни училишта и две високообразовни институции)“, се наведува во денешното соопштение на Стопанската комора.  

Во моментов нема коментари за веста. Биди прв да коментира...

Остави коментар