Во Македонија денес се слави 8 Септември – Денот на независноста односно 32 години од прогласувањето суверена и самостојна држава. Нашата земја во овој период мина низ многу премрежија на политички и на економски план, а тоа најдобро го отсликуваат основните економски параметри.
Ниски стапки економски раст, растечки трговски дефицит и континуирано задолжување се главните белези за македонската економија во изминативе три децении. Тие треба да бидат причина за загриженост, но и за освестување на носителите на политики дека се потребни промени за се подобри економската состојба во иднина.
Во Македонија од година во година се зголемува јавниот долг, а годинава достигна рекордно ниво. Во 2002 година јавниот долг на земјава изнесувал 1,8 милијарди евра, а заклучно со вториот квартал од годинава тој изнесува 8,3 милијарди евра. Зголемувањето на јавниот долг не би било проблематично доколку во изминатиов период се инвестираше во подобрување на патната и железничката инфраструктура, зголемување на ефикасноста на администрацијата и поттикнување економски развој.
Спротивно на тоа, голем дел од позајмените пари се користеа за непродуктивни цели кои не носат економски раст. Најдобар показател за тоа е што во изминативе три децении Македонија само во една година (2007) има остварено висок раст на БДП над границата од шест проценти.
Неадекватните економски политики не донесоа зголемување на извозот поради што Македонија континуирано урива рекорди во дефицитот во трговската размена. Имено, во 1998 година дефицитот бил околу половина мијарда евра, а лани достигнал 3,8 милијарди евра.
Кога станува збор за стандардот на граѓаните, неславни рекорди лани урнавме и кај инфлацијата. Таа се искачи на 16,1 проценти во првиот квартал од годинава, што е рекордно ниво од 1995 година наваму.
Но, не се така црно на економски план. Македонија денес може да се пофали како дестинација за која постои зголемен интерес кај странските инвеститори.
Статистиката покажува дека лани во земјава влегле странски инвестиции од 670 милиони евра, што е највисоко ниво од 2003 година досега.
Позитивни придвижувања има и кај стапката на невработеност која падна на историски најниско ниво.
.webp){kind=icon}
