Цените на над 50 основни прехранбени производи ќе се намалат за минимум десет отсто од наредната среда, потврди денеска министерот за економија Крешник Бектеши, по средбата со претставници на осум синџири на маркети, на која присуствуваа директорот на Државниот пазарен инспекторат, Горан Трајковски, и претставници на Стопанската комора. Од производите што ќе подлежат на намалување на цените, 90 проценти се даночат со пет отсто ДДВ, а другите со десет отсто ДДВ.
„Имавме многу конструктивна дебата и заеднички се согласивме дека има простор за намалување на цените. Тоа како општествено одговорни претпријатија го прифатија и синџирите на супермаркети, што значи дека ќе биде усвоена одлуката на Министерството за економија на владината седница во вторник и реализирана во делот на намалување на цените на прехранбените производи во сите синџири на супермаркети“, изјави Бектеши.
МИА
Листата на производите ќе биде објавена во вторник, по владината седница. За ублажување на инфлацијата, министерот за економија најави и дополнителни мерки.
„Моментално Министерството за економија работи на дополнителни мерки за дистрибутерите и за производителите на прехранбени производи, кои утре најверојатно ќе бидат свикани на состанок во Министерството“, рече Бектеши.
Во текот на следната недела ќе се направат и измена и дополнување на Законот за државен пазарен инспекторат, со кои ќе се зголемат ингеренциите на инспекторите на ДПИ за да можат веднаш да постапат и да го затворат објектот без да поминат одредени судски постапки.
„До крајот на наредната недела ќе го имаме и новото законско решение за нефер трговски практики со кое ќе се укинат над 20 отсто од одредени давачки во синџирот на трговија, почнувајќи од производството“, истакна Бектеши.
На маркетите ќе им биде дозволено акциски да ги намалат цените само на производите на кои им истекува рокот. Во спротивно, доколку спроведуваат акциски продажби, до 30 ноември ќе им следуваат санкции.
.webp){kind=icon}
Во моментов нема коментари за веста. Биди прв да коментира...