.webp){kind=icon}
Во маркетите ќе бидат означени цените на производите што ќе поевтинат за 10 проценти и што ќе бидат опфатени со владината одлука што се очекува да биде донесена утре, најави денеска министерот за економија Крешник Бектеши.
„Откако се направени сите анализи и дискусии со стопанските комори и сите чинители во трговијата, излезе идеја да се обележат цените што ќе бидат намалени од среда. Затоа Министерството за економија, постапувајќи во согласност со Законот за трговија, ќе ја дополни одлуката во делот на вршење на трговијата и со обележување на сите производи што утре најверојатно ќе бидат наведени на седница на Владата со намалување на цената, која ќе биде минус 10 проценти од изложените цени на 1 август во синџирите на маркетите“, рече на прес-конференција министерот за економија.
Ова, како што појасни тој, значи дека секој потрошувач кога ќе оди во супермаркет ќе има можност да види ознака каде што ќе биде наведена гарантираната цена и ќе се знае дека со цените што ќе бидат означени со оваа ознака нема да може да има нагорно зголемување до 30 ноември. Исто така, како што посочи тој, тоа е и поттик до сите чинители во трговскиот, но и производителите на прехранбени производи до среда доброволно да се пријават до Министерството за економија ако не се влезени во одлуката за да имаат ваква ознака и да ги намалат дополнително цените. Тоа може да го направат субјектите и од другите сектори поради тоа што, според Бектеши, има интерес од одредени компании во ова кризно време да станат општествено поодговорни и да им излезат во пресрет на граѓаните.
Како што информира министерот, листата со производи за кои ќе има замрзнување на цените е веќе завршена и ќе биде доставена утре на седница на Владата. Ќе има обврски и за трговците на мало и за трговците на големо, како и за домашните производители.
Тој најави дека задутре ќе почнат засилени контроли од Државниот пазарен инспекторат (ДПИ), а ќе бидат вклучени и членови на Владата во делот на надзорот за тоа како се спроведуваат контролите.
