Грижата на ЕЦБ: Дали растот на еврото ќе се претвори од благослов во проклетство?

Претставниците на Европската централна банка (ЕЦБ) почнуваат да се грижат дека брзото зголемување на вредноста на еврото би можело да ги попречи напорите за зацврстување на инфлацијата на два отсто.

Единствената валута годинава има пораст од околу 14 отсто во однос на доларот бидејќи довербата во САД се намалува, помагајќи на тој начин да се ограничи растот на цените, што сега прецизно се совпаѓа со целта на ЕЦБ. Сепак, опасноста е дека растот го турка еврото до нивоа што може да предизвикаат инфлацијата да ја надмине целта.

Со оглед на тоа што валутата е на прагот на својата најдолга серија победи во повеќе од две децении, таа тема беше истакната на годишниот собир на ЕЦБ во Синтра, Португалија. Потпретседателот Луис де Гвиндос предупреди дека раст над 1,20 долари би бил проблематичен.

„Дотогаш може малку да го занемариме тоа“, изјави тој за „Блумберг“. „Нешто подалеку од тоа би било многу покомплицирано“.

Голем дел од порастот на еврото се должи на слабоста на доларот бидејќи царинската политика на Доналд Трамп ја намалува довербата, испраќајќи ги инвеститорите надвор од границите на САД. Промената првично беше добредојдена не само поради нејзините својства за борба против инфлацијата туку и како можност за зголемување на улогата на заедничката европска валута на светската сцена.

Прашањето сега е колку далеку може да отиде. Трговците предвидуваат дека прагот што го наведува Гвиндос ќе биде достигнат во 2026 година.

„Постои одредено ребалансирање кон еврото, особено од европските инвеститори, но и од страна на глобалните инвеститори“, изјави за Си-ен-би-си (CNBC) главниот економист на ЕЦБ, Филип Лејн. „Она што го видовме досега изгледа трајно, но, секако, многу сме љубопитни да видиме што ќе се случи следно“.

Bloomberg

 

Многуте коментари за еврото - од кои голем дел оди подалеку од стандардните ставови на ЕЦБ дека валутата е еден од многуте фактори што ги проценува и дека како цел не е поставено конкретно ниво - сугерираат дека барем некои креатори на политики стануваат помалку задоволни.

„Тие сè уште не сакаат да го признаат тоа, но силното евро ќе биде сė поголема грижа“, рече Карстен Брзески, раководител на макроекономијата на ИНГ (ING). „На крајот, понатамошното зајакнување на еврото не само што ќе донесе поголем дезинфлациски притисок туку и ризик од економска штета за веќе страдачката извозна индустрија - доволно за да се оправдаат повеќе намалувања на каматните стапки“.

Дополнителни намалувања на депозитната стапка, при веќе постојни намалувања, е нешто што гувернерот на латвиската централна банка Мартинс Казакс го дискутираше во посебно интервју. По паузата во јули, пазарите и аналитичарите гледаат уште едно намалување годинава, на 1,75 проценти.

„Девизниот курс годинава значително се помести, а тоа ќе влијае и на инфлацијата“, рече Казакс. „Доколку еврото значително се зголеми, тоа ќе влијае на инфлацијата и извозот, што би можело да ја наруши рамнотежата кон уште едно намалување“.

Bloomberg

 

На панел во Синтра заедно со претседателот на Фед, Џером Пауел, како и други шефови на централни банки, претседателката Кристин Лагард одби да коментира за девизниот курс, но рече дека 2025 година може да биде клучна година за доларот.

„Тоа нема да се случи тукутака прекуноќ - никогаш не се случувало така во историјата“, рече таа. „Но, очигледно е дека нешто е расипано и сметам дека прашањето е дали тоа може да се поправи или ќе остане расипано“.

Скокот на еврото, кој Лагард во минатото го нарече „контраинтуитивен, но оправдан“, е една метрика што креаторите на политики ќе ја земат предвид при одредувањето на стапките. За Гедиминас Симкус од Литванија, брзината со која расте еврото е нешто што ЕЦБ мора особено внимателно да го следи.

„Во историски услови, девизниот курс не е невообичаен“, рече тој во едно интервју. „Но темпото на приспособување значи дека мора да го сфатиме сериозно“.

Валутата во просек изнесуваше 1,1829 долари откако беше воведена во 1999 година, а вчера се тргуваше малку под тоа ниво. Претседателот на Бундесбанк, Јоаким Нагел, го искористи тој аргумент за да ја намали целата загриженост.

„Да, има некои прелевања што доаѓаат од девизниот курс, но тоа е само еден фактор“, изјави тој за „Блумберг“. „Ги земаме предвид сите фактори што водат до повисока и пониска инфлација и ова е релевантниот начин на кој треба да го гледаме тоа“.

Слично на тоа, Мадис Милер од Естонија сигнализираше дека е помалку загрижен за најновите движења на заедничката валута.

„Апрецијацијата на еврото беше доста брза“, рече тој. „Но, нивото сè уште е во историските граници. Не мислам дека треба да бидеме премногу загрижени во овој момент“.

Во моментов нема коментари за веста. Биди прв да коментира...

Остави коментар