Министерот за економија Крешник Бектеши изјави дека инфлацијата во делот за храната за месец октомври ќе биде под 2 отсто, а вкупната инфлација во државата ќе биде преполовена.
„Според моите првични податоци за месец октомври кои ќе ги објави Државниот завод за статистика следната недела инфлацијата во делот на храната ќе биде под 2 отсто, а вкупната инфлација во државата ќе биде преполовена споредено со претходниот месец и тоа е како резултат на мерките кои ги усвои Владата, посебно Министерството за економија, рече министерот за економија Крешник Бектеши во интервју во Тема на денот на ТВ Сител.
Министерот потенцираше уште еднаш дека мерките се носени во постојана комуникација, состаноци со сите засегнати страни од производителите и до дистрибутерите и ланците на супермаркети. Упати порака до сите ланци на супермаркети, по добиените пријави од дистрибутери и производители да не бараат прикривање на одредени давачки.
„Имаме пријави од дистрибутери и производители дека од нив се бара одредени давачки како што се рабат, рекламирање, маркетинг и слично да се прикријат, им порачувам на супермаркетите да не го прават тоа, затоа што го знаат Законот за потрошувачи. Да не се доведеме повторно во ситуација, дел од големите ланци на супермаркети да бидат затворени. Но, овој пат тоа нема да трае само пет дена, овој пат ќе трае 30 дена“, рече министерот Бектеши.
Мерката за замрзнување на ценките на храната или така наречената мерка „гарантинара цена“ ќе важи до крајот на годината. Со неа се огранчени цените на голем број основни прехранбени производи.
Народната банка во последното соопштение наведе дека ваквите мерки помагаат за намалување на инфлацијата, но дека таа забавува побавно од планираното и и натаму е над историскиот просек.
„Домашната инфлација и натаму забавува но посилно, сведувајќи се на 6,6 отсто на годишно ниво во септември 2023 година. Забавувањето на годишната стапка на инфлација е резултат на забавениот раст на цените кај сите три компоненти, со најголем придонес од прехранбената компонента. Сепак, вкупната инфлација забавува малку послабо од очекувањата според последните проекции, а нејзиното ниво сѐ уште е над историскиот просек“, констатира НБРМ.
Од друга страна, базичната стапка на инфлација забавува во целост во согласност со очекувањата, укажувајќи на намалување на ценовните притисоци од помалку променливите ценовни категории, а во согласност и со преземените монетарни мерки.
„Најновите очекувања за увозните цени, односно светските цени на примарните производи, се ревидирани главно во надолна насока, при што и натаму преовладуваат очекувања за пад на цените во наредниот период. Ризиците од надворешното окружување во однос на идното движење на цените и натаму се неповолни и неизвесни, пред сѐ поради непредвидливиот карактер на војната во Украина и најново, на Блискиот Исток, како нов фактор на ризик“, велат од централната банка.
За до крајот на оваа година НБРМ планира стапка на инфлација меѓу 8 и 9 отсто на годишно ниво.
.webp){kind=icon}
