.webp){kind=icon}
Глобалните трошоци за храна се намалуваат 12-ти последователен месец и го достигнаа најниското ниво од јули 2021 година, иако сè уште нема знаци дека тој тренд всушност се пренесува на полиците во маркетите.
Индексот на Обединетите нации (ОН) за цените на прехранбените производи се намали за 2,1 отсто во март, заокружувајќи ја со тоа најдолгата низа на пад во последните три децении.
Минатомесечното намалување беше поттикнато од житарките, растителните масла и млечните производи, кои го неутрализираа растот на цените на шеќерот и месото.
Показателот падна за 21 отсто од рекордот постигнат пред една година, кога руската инвазија врз Украина го наруши извозот на жито, иако нивото сè уште е зголемено за речиси 40 отсто споредено со пред две години.
„Иако цените на глобално ниво паднаа, тие сè уште се многу високи и продолжуваат да растат на домашните пазари, што претставува дополнителен предизвик за храната“, рече Максимо Тореро, главен економист во Организацијата за храна и земјоделство на ОН.
Инфлацијата на храната во многу земји продолжи да расте, бидејќи поевтините артикли се компензираат со други трошоци, како енергија, работна сила, транспорт и преработка. „Во многу земји во развој, кои во голема мера се потпираат на увоз на храна, ситуацијата е влошена поради слабоста на локалната валута“, смета Тореро. Но цените продолжуваат да растат и во побогатите земји, што врши притисок врз владите да реагираат.
Промена на индексот на храна на ФАО / Bloomberg Mercury
„Инфлацијата на цените на храната сè уште е сериозна загриженост во многу земји“, објави вчера Системот за земјоделски пазарни информации, кој ги следи глобалните пазари на храна.
ФАО денеска објави дека одредени обилни резерви, намалената побарувачка за увоз и продолжувањето на Црноморската иницијатива за жито придонесуваат за падот на трошоците на прехранбените производи.
