.webp){kind=icon}
Вредноста на вкупните трансакции направени кон интернет-продавниците од Македонци дома и во странство, како и од иматели на странски картички во земјава, во текот на 2022 година изнесува 550,2 милиони евра и има пораст од 25 отсто во однос на 2021 година.
Во првата половина од годинава растот споредено со првото полугодие лани изнесува 18,5 отсто.
Ова, како што беше истакнато на шестата конференција за е-трговија во организација на Асоцијацијата за е-трговија на Македонија (АЕТМ), која денеска се одржува во Скопје под мотото „Редефинирање на е-трговијата со вештачка интелигенција“, го покажуваат податоците на Народната банка што се обработени во анализата со наслов „Преглед на е-трговијата во Р.С. Македонија и споредба со земјите од Западен Балкан и Европа, 2023 година“.
Прочитајте повеќе: Вработениот што користи вештачка интелигенција ќе го замени оној што не користи
Нина Ангеловска
Асоцијација за е-трговија
„Дека продолжува трендот на зголемување на бројот на уреди што примаат платежни картички на виртуелни места на продажба покажува и фактот дека и понатаму има пораст на бројот, кој во јуни 2023 година изнесувал 1.939 интернет-продажни места. Имајќи го предвид значењето на понудата за раст на оваа индустрија, а со цел да се добие појасна слика, АЕТМ спроведе и емпириска анализа за уникатниот број на е-трговци според утврдена методологија. Сознанијата се доста изненадувачки, односно бројот на активни е-трговци во земјава е помалку од половина од бројот на интернет-продажни места што ги следиме по извештаите на Народната банка“, рече претседателката на АЕТМ, Нина Ангеловска, при презентацијата на анализата.
Таа нагласи дека потенцијалот за раст на е-трговијата зависи од повеќе алки во синџирот на е-трговијата, кој во анализата се следи преку индексот за логистички перформанси и индексот за подготвеност за мрежна поврзаност.
„Меѓу слабостите што беа детектирани е индикаторот меѓународни испораки од индексот за логистички перформанси. Тоа е предизвик што беше детектиран и со минатогодишното истражување за геоблокирање на ЦЕФТА-пазарите поддржано од ЦЕФТА-секретаријатот. Геоблокирање постои меѓу овие пазари во е-трговијата, а како главна причина се наведени скапата испорака и царинските давачки“, посочи Ангеловска и додаде дека сите детектирани предизвици од анализата претставуваат основа за креирање иницијативи и препораки за дејствување.
Нина Ангеловска
Асоцијација за е-трговија
Таа истакна дека трета година во анализата се става посебен фокус на прогресот на е-трговијата во земјите од Западен Балкан.
„Сите земји од Западен Балкан се слични кога станува збор за развојот на е-трговијата, имаме многу заеднички карактеристики, некои земји се подобри од другите, но сите се рангирани најниско споредено со европските земји, притоа некои се движат побрзо некои побавно. Според употребата на интернет, Македонците со 88 отсто заедно со Црногорците се најдобри од балканските земји. Кога станува збор за онлајн купување, Србите се најдобри со 63,5 отсто од интернет-корисниците, Македонците 49,5, а најмалку Црногорците“, истакна Ангеловска.
