.webp){kind=icon}
Асоцијациите за е-трговија на Северна Македонија, Србија, Босна и Херцеговина и на Албанија потпишаа меморандум за формирање Балканска алијанса за е-трговија, која ќе се залага за олеснување и унапредување на регионалната е-трговија. Формирањето на Балканската алијанса беше поддржaнo од Отворениот регионален фонд за Југоисточна Европа - надворешна трговија, спроведен од Германското друштво за меѓународна соработка (ГИЗ), поддржан од Германија и од ЕУ, во чии канцеларии беше потпишан меморандумот, соопштија од Асоцијацијата за е-трговија на Македонија (АЕТМ).
Претседателката на АЕТМ, Нина Ангеловска Станков, е изгласана за прв претседател на Балканската алијанса за е-трговија (англ. BECA - Balkan eCommerce Alliance). Ангеловска заедно со тимот на АЕТМ како прв претседател ќе ја предводи работата во првата година. Асоцијацијата за е-трговија на Македонија е наедно првоформирана асоцијација во регионот, со најголемо искуство и подготвеност, а изборот на Ангеловска го поддржаа сите асоцијации.
Depositphotos
Петте асоцијации за е-трговија од Балканот потписници на меморандумот се основачи и членки на управниот одбор на Балкaнската алијанса за е-трговија, и тоа од Асоцијацијата за е-трговија во Србија - Иван Танасковиќ, од Асоцијацијата за е-трговија во Албанија - Валер Пиндери, од Асоцијацијата за е-трговија од Босна и Херцеговина - Орхан Газибеговиќ, од Асоцијација за интернет-трговија „eComm“ од Босна и Херцеговина - Алма Ахмиќ и од Асоцијација за е-трговија на Македонија - Нина Ангеловска. Алијансата се состои од следните органи на управување - собрание, управен одбор, претседател на управниот одбор и на собранието, главен координатор и национални координатори за секоја земја.
„Е-трговијата како интегрален дел на дигиталната економија може да одигра значајна улога за економскиот раст на регионот. Сите земји гледано сами за себе се фрагментирани и мали пазари, а за да може да се отклучи потенцијалот, потребно е да можеме да ги гледаме сите земји како еден интегриран пазар. Меѓу главните предизвици се скапата прекугранична испорака, царински давачи и процедури, административните тешкотии и неунифицираните правила и прописи. Веќе долго време се прават напори за поместување, но прогресот оди многу бавно. Воопшто, сите земји од регионот се најниско рангирани споредено со европските кога станува збор за е-трговија. Единствно со холистички пристап и здружени сили можеме да направиме прогрес. Верувам дека Балканската алијанса за е-трговија може да одигра значајна улога во трасирањето на патот кон подобра иднина за развој на е-трговија на Балканот и верувам дека за многу брзо време ќе стане препознаена како 'глас на е-трговијата' на Балканот. Ќе ми претставува задоволство да ја водам Алијансата на самите почетоци, при поставувањето на основите за просперитетна работа, и благодарна сум на довербата“, изјави Нина Ангеловска, претседателката на АЕТМ и BECA.
Активностите на BECA ќе бидат насочени кон создавање подобра иднина на прекуграничната е-трговија на Балканот, преку креирање политики поврзани со е-трговија и лобирање за промени, но исто така ќе се работи и на решавање различни предизвици од синџирот на е-трговија. Тоа вклучува решавање прашања поврзани со царинските такси, административни пречки, заеднички стратегии за испорака, регулаторни рамки и многу повеќе. Алијансата ќе служи и како основа за споделување информации, знаења, мислења и практики помеѓу членките.
