Реакции: Владата ќе поддржи раст на платите само во три сектори

Државната помош за зголемување плати нема да важи за сите работници. Според предлог-законот што Министерството за труд и социјална политика го достави до Собранието, субвенции за да зголемат плати ќе добијат само работодавците од секторите градежништво, угостителство и текстилна индустрија.

Во образложението на предлог-законот за ослободување од плаќање на дел од придонесите од задолжителното социјално осигурување поради зголемување плата не е наведено зошто само овие три дејности влегуваат во текстот.

Ваквиот предлог на Министерството за труд е неприфатлив за Организацијата на работодавци на Македонија (ОРМ), од каде што бараат повлекување на законот од собраниска процедура. Од Сојузот на синдикатите на Македонија (ССМ) исто така сметаат дека мерката треба да важи за сите работници во приватниот сектор чија плата е под просечната на национално ниво.

Предлог-законот предвидува ослободување од придонесите за зголемување плата од најмалку 3.000 и најмногу 9.000 денари.

Организацијата на работодавци со допис до предлагачот на законот, министерката за труд Јована Тренчевска, изразува несогласување и за содржината на законот и за начинот на спроведување на постапката за негово донесување.

„Ова наше несогласување е засновано на значителната реакција од страна на нашите членки и упатените прашања до Организацијата на работодавци на Македонија од кога се подготвувал наведениот закон, кој учествувал и дали сме дале согласност за негово донесување. За членките на ОРМ, која е репрезентативна организација што ги застапува интересите на работодавците и наедно е дел од Економско-социјалниот совет, предложениот закон е од суштинско значење. За жал, ОРМ не доби ниту една покана за учество во подготовката на законот од страна на Министерството на труд и социјална политика. Од истото министерство не беше примено никакво барање за изјаснување, а предлогот на закон не беше ставен на седницата на Економско-социјалниот совет, што, според ЗРО и деловникот на ЕСС, би требало да се случи пред да се пристапи кон изгласување“, се наведува во дописот.

Од ОРМ уште велат дека социјалните партнери имаат критична улога во донесувањето решенија преку дијалог што треба да биде транспарентен. А начинот на кој Владата како трет партнер во економско-социјалниот совет постапува не придонесува за развој на социјалниот дијалог, пишуваат од ОРМ.

Организацијата бара предлог-законот да биде повлечен и да се даде доволно време за консултации со работодавците, „како и можност за објавување на нашето мислење пред да се пристапи кон изгласување, за обезбедување простор за дијалог на седница на Економско-социјалниот совет“.

Сојузот на синдикатите на Македонија ги поздравува напорите на Владата да обезбеди поддршка за граѓаните и фирмите, но потсетува дека мерките се креирани без претходни консултации со синдикатите.

За ССМ особено е важна мерката за ослободување од плаќање на дел од придонесите за раст на платите во приватниот сектор. Според нивните пресметки, ваквата мерка би овозможила раст на нето-платите од околу 10 отсто, но велат дека е многу важно таа да важи за сите работници.

„Очекуваме Владата да овозможи оваа мерка да се применува во сите сектори и дејности за сите работници чија плата е во висина до ниво на просечна месечна плата на национално ниво, а за тоа ја даваме нашата поддршка за имплементација на оваа мерка особено поради тоа што субвенциите ќе бидат за период од една година, а платите на работниците ќе останат зголемени и по нејзиниот истек“, се истакнува во реакцијата на ССМ.

Во моментов нема коментари за веста. Биди прв да коментира...

Остави коментар