.webp){kind=icon}
Кризата со бродскиот транспорт во Црвено Море веќе почнаа да ја чувствуваат и македонските компании. Нарачките доцнат, трошоците се зголемуваат. Избегнувајќи го теснецот Баб ел-Мандеб на влезот на Црвено Море поради напади од Хутите, бродовите на транспортните компании се насочија кон алтернативни маршрути,
Зголемените трошоци за нафта и пристанишните такси предизвикаа драстичен раст на цената на бродскиот транспорт, што на крајот ќе се рефлектира на цените на крајните производи, предупредуваат компаниите за бродско-контејнерски превоз на стоки во Македонија.
„За жал, промената на маршрутата има многу големо влијание на цената, која од средината на декември досега е зголемена за 200-300 проценти од источните земји, додека другите дестинации исто така трпат последици, но не со толкав раст на цената“, велат од компанијата „Транслог“.
Depositphotos
Покрај зголемените цени, доцнат и нарачките, што го става во ризик производството. Во идеални услови, нарачаната стока со бродски контејнер од Кина се доставува за 35-40 дена, сега ниту една нарачка не е пристигната. Најавите се дека доцнењето ќе биде минимум три недели, но никој со сигурност не потврдува дека нарачаната стока ќе биде транспортирана.
Состојбата во Црвено Море предизвик и за автомобилската индустрија
Зависноста од азискиот пазар за компоненти потребни на компаниите од автомобилскиот сектор во земјава е огромна. Секое доцнење значи стопирање на производството, а тоа ќе предизвика нарушување на автомобилскиот пазар во услови на зголемена побарувачка, потенцираат странските инвеститори во земјава.
„Се гледа потенцијален проблем за тоа што се ќе се случува до крајот на годинава поради случувањата во Црвено Море со најголемите бродски компании и нивниот транспорт. Тоа директно ќе влијае на каков начин и колку брзо компонентите што доаѓаат од Азија како репроматеријали ќе можеме да ги користиме за ефикасно да работиме според потребите и барањата на пазарот“, вели Виктор Мизо, претседател на Советот на странски инвеститори и генерален директор на „Костал Македонија“.
Блумберг Адрија
Европскиот пазар ќе биде најпогоден
Транспортот од азискиот континент до европскиот е најпогоден. Сè повеќе компании се соочуваат со проблем со испорака на стоки поради конфликтот во Црвено Море. Минатата недела „Тесла“ и „Волво“ престанаа со дел од своето производство во Европа поради недостиг од компоненти.
Германската финансиска компанија „Алијанц“ објави дека покрај автомобилскиот сектор, со можни прекини во работењето ќе се соочат и трговците на мало, бидејќи повеќето од нив се потпираат на движењето на стоки од производителите во Азија до потрошувачите во остатокот од светот, а подолгото време на испорака може да доведе до намалување на резервите и повисоки трошоци.
„Ублажувачки фактор е тоа што постојните нивоа на резерви се генерално високи, а цените на превозот кај многу трговци имаат тенденција да се намалуваат на подолг период, така што е потребно време за целосно да се одрази влијанието на пазарот на самото место“, се наведува во извештајот.
Bloomberg Mercury
Бројот на бродови што минуваат низ Баб ел-Мандеб е преполовен во споредба со претходниот месец
Според податоците на „Блумберг“, 114 брода, вклучувајќи и танкери за нафта, носачи на руда и контејнерски бродови, продолжуваат да пловат низ преминот Баб ел-Мандеб. Пред еден месец на таа маршрута поминале 272 брода, а пред шест месеци 252.
Bloomberg Mercury
Најмногу е намален бројот на бродови за превоз на гас, дури за 96 отсто во однос на пред еден месец. По нив следуваат контејнерските бродови, со намалување од околу 80 проценти. Бројот на танкери со нафта што минуваат низ областа е намален за околу 55 отсто во споредба со пред еден месец. Иако значително е намален бројот на транспорти, значително помалку е намален и бројот на оние што превезуваат нафта од Русија. Најмалку погодени биле бродовите за транспорт на руда, кај нив намалувањето изнесува 25 отсто во споредба со пред еден месец.
