Намалување на цените на храната и зголемување на квалитетот на производите се очекува од имплементацијата на Законот за забрана на нефер трговски практики во синџирот на снабдување на земјоделски и прехранбени производи којшто го усвои Собранието на денешната седница. Со Законот се уредуваат условите и начинот како ќе се врши трговија со земјоделски и прехранбени производи.
Од Министерството за економија велат дека прв пат во државата се носи вакво законско решение во кое има наведено 26 нефер трговски практики кои ќе се уредуваат.
„Со овој Закон се очекува да се елиминира неоправданиот и непропорционалниот трансфер на економски ризик од еден трговски партнер на друг или да се наметне значителна нерамнотежа на правата и обврските на еден трговски партнер кон друг“, велат од Министерството.
Оттаму објаснуваат дека надоместоците кои сега се наплаќаат во договорниот однос меѓу купувач и добавувач, а кои надоместоци сериозно влијаат на малопродажната цена на штета на потрошувачите, ќе се сметаат за забранета нефер трговска практика.
„Клучно во овој дел е поголемо приближување и воедначување на националната легислатива со легислативата на земјите членки на Европската унија. Република Северна Македонија е единствената земја од Западен Балкан кој ја транспонира оваа Директива на ЕУ, со цел да воспостави фер и рамноправни односи во однос на доминацијата на преговарачка моќ во трговијата помеѓу двајца или повеќе деловни партнери“, наведуваат од Министерството.
Со усвојувањето на Законот се очекува да се постигнат позитивни ефекти во деловното работење кај сите оператори (купувачи и добавувачи), кои се активни во синџирот снабдување со земјоделство и храна во различни фази на производство, преработка, маркетинг, дистрибуција и малопродажба на земјоделски и прехранбени производи и соодветна примена на забраните на нефер трговски практики во синџирот на снабдување на земјоделски и прехранбени производи.
„Дополнително, законското решение обезбедува поефикасни контроли и надзор на Комисијата за заштита на конкуренцијата која добива дополнителна надлежност. Комисијата има за задача во првите шест месеци од стапувањето на сила на законот да ги усогласи сите нејзини акти со одредбите на овој предлог и да обезбеди ресурси на технички и технолошки квалификуван кадар за правилна и непречена контрола на одредбите кои се наведени во предлог законот“, велат од Министерството.
Во Законот исто така е наведено процентуално колку може да биде максималниот рабат што може маркетите да го бараат од производителите и добавувачите кои сега надминуваат над 30-40 проценти од цената.
„Со ова решение е предвидена листа на земјоделски и прехранбени производи каде рабатот ќе биде ограничен на 10 проценти и во склоп на тоа ќе конкурираат меѓу себе ланците на супермаркети што ќе влијае во намалување на цените“, велат од Министерството.
За непочитување на законските одредби се предвидени глоби до 20.000 евра.
.webp){kind=icon}
