Мицкоски: Задоволен сум од економскиот раст од три отсто во третиот квартал

Премиерот Христијан Мицкоски е задоволен од статистичкиот податок што укажува дека бруто домашниот производ (БДП) пораснал за три проценти во третото тримесечје од 2024 година. Тој смета дека за краток период од половина година владата успеала да ја консолидира економијата.  

На прес-конференција посветена на економскиот раст, премиерот рече дека податоците што ги објави Државниот завод за статистика ги надминале и очекувањата на владата и прогнозите на Светска банка, нагласувајќи дека во услови на сложени геополитички и економски случувања, три проценти е меѓу најголемите во рамките на ЕУ. 

„Успеавме да ја консолидираме економијата и индикаторите со коишто денеска можеме да излеземе пред македонската јавност во ова тримесечје се едни од најдобрите во Европа. Многу ретко до сега сме имале можност да се пофалиме со економски резултат што ќе биде еден од најдобрите во Европа. Само пет земји членки на ЕУ имаат повисока стапка на раст во третиот квартал, а што се однесува во регионот, помала стапка на раст во третиот квартал имаат две земји членки на ЕУ, тоа се Грција и Бугарија, 2,4 проценти. Романија е во негативно салдо -0,3 проценти, Словенија е еден процент. Негативни се стапките на раст на Естонија, Австрија, Латвија, Германија итн. Ако се анализираат податоците ревидирани од првите три квартали оваа година, тогаш може да кажеме дека БДП порасна во просек повеќе од 2,6 проценти, што претставува повеќе од предвидувањата на некои од меѓународните институции, мислам дека тоа беше Светка банка, која предвидуваше раст од 1,8 проценти за 2024 година на БДП на македонската економија“, рече Мицкоски на прес-конференција во Владата. 

За четвртиот квартал тој очекува сличен или повисок раст со што, како што рече, би се доближиле на годишно ниво од три проценти, што е многу повеќе од предвидените 1,8 проценти.

Детали во врска со статистичките податоци прочитајте во анализата на „Блумберг Адрија“ на овој линк.

„Покрај историски најголемиот раст на странски инвестиции кое до крај на годината очекуваме да надмине една милијарда евра, еве, успеавме после консолидирање на македонската економија првите индикатори да бидат едни од најдобрите во Европа, секако и најдобри во регионот. Тука не застануваме, ќе продолжиме да работиме. За кратко време, да заклучам, имаме плус три проценти на БДП и рекордно ниво на странски инвестиции за кои, како што кажавме, до крајот на годината очекуваме да бидат повеќе од една милијарда евра. Можам да кажам дека опоравувањето е на задоволително ниво. Секогаш може подобро и ние ќе се стремиме да биде подобро и ќе биде подобро. Што се однесува до личната оценка можам да кажам за краток период ја консолидиравме економијата, и можам да кажам дека сум задоволен“, истакна Мицкоски. 

Според него, потребни се крупни економски чекори за да се надомести изгубеното во изминатите седум години бидејќи, како што напомена, Владата пред речиси шест месеци наследила индустрија во опаѓање, неисплатени плати, јавни претпријатија и акционерски друштва во доминантна државна сопственост во банкрот.

 

Во моментов нема коментари за веста. Биди прв да коментира...

Остави коментар