Банката „Халкбанк“ соопшти за обиди за неовластено собирање на лични и финансиски податоци преку лажни СМС пораки, кои се испраќаат до граѓаните, во име на оваа банка.
Од таму нагласуваат дека ваквите пораки започнале да циркулираат од 28 декември минатата година и сè уште се актуелни.
„Се испраќаат лажни СМС пораки со злоупотребено име на банката, кои содржат линк до лажни веб-страници со намера за измама. Целта на овие пораки е прибирање на податоци за платежните картички и можност за нивна злоупотреба“, посочуваат од банката.
Од „Халкбанк“ апелираат до граѓаните да се воздржат од отворање на линковите добиени преку овие пораки, да не внесуваат лични или финансиски податоци на посочените веб-страници и да бидат претпазиливи.
„Никогаш не би побарале од своите клиенти лични податоци или информации за платежните картички преку ваков тип пораки, а сите комуникации од страна на банката се одвиваат исклучиво преку официјални и безбедни канали“, порачуваат од „Халкбанк“.
Depositphotos
На ваквите предупедувања до граѓаните се надоврза и Минстерството за внатрешни работи (МВР).
„Измамниците често се претставуваат како претставници на банки, јавни институции или компании за да ги навлечат жртвите. Секторот за компјутерски криминал изврши проверки во врска со телефонска измама и утврдил дека може да се користат повеќе средства за манипулирање со повици“, посочија од ресорното министерство.
Полицијата апелира до граѓаните да бидат внимателни кога добиваат повици или пораки од непознати испраќачи.
„Бидете внимателни кога примате повици од непознати броеви или од броеви кои се чини дека се од доверливи институции. Никогаш не споделувајте лични информации, банкарски информации или лозинки преку телефон. Доколку се сомневате дека сте биле жртва на ваква измама, веднаш пријавете го случајот во најблиската полициска станица“, порачуваат од МВР од каде велат дека ваквите измами им се добро познати на надлежните институции, бидејќи ова не е прв пат граѓаните да бидат измамени.
Уште еден тип на измама за кои надлежните предупредија изминатиот период е за измамници, кои преку социјалните мрежи се претставуваат како „финансиски советници“ и најчесто нудат услуги за тргување со криптовалути.
Во овој случај измамниците се рекламираат со лажни профили или спонзорирани реклами, често ветувајќи висока заработка и брзи добивки, со што успеваат да ги привлечат жртвите кои бараат начин да инвестираат.
„По воспоставувањето контакт преку социјалните мрежи, измамниците комуницираат со жртвите преку телефонски повици, користејќи ВОИП (VOIP) броеви, кои обично изгледаат како локални броеви за да стекнат доверба. Во текот на разговорот, тие ги убедуваат жртвите да инсталираат софтвер за далечински пристап, под изговор дека им е потребен за да им помогнат со поставување на платформата за тргување. Откако ќе добијат далечински пристап до компјутерот или мобилниот уред на жртвата, измамниците пристапуваат до електронското банкарство и ги префрлаат паричните средства од банкарските сметки на жртвите. Во многу случаи, жртвите остануваат без средства пред да сфатат дека се измамени, а штетите се значителни“, информираат од МВР.
.webp){kind=icon}
Во моментов нема коментари за веста. Биди прв да коментира...