Владата ќе бара заем од 56 милиони евра преку аукција на записи и обврзници

Владата на аукција на државни записи и обврзници закажана за утре (4 февруари) од инвеститорите ќе бара заем во вкупен износ од 3,5 милијарди денари (околу 56 милиони евра). На аукцијата се предвидува да се понудат едногодишни државни записи во износ од три милијарди денари (околу 48 милиони евра) со каматна стапка од 3,80 проценти.

Истовремено, се предвидува да се понудат 15-годишни државни обврзници во износ од 500 милиони денари (околу осум милиони евра) со купонска каматна стапка од 5,1 проценти.

„Блумберг Адрија“ веќе пишуваше дека во периодот 2025-2028 година Македонија во четири наврати треба да отплати вкупно 2,4 милијарди евра по основ на претходни задолжувања преку издадени еврообврзници, како и дека предизвикот да се најдат пари за финансирање на долгот почнува оваа година кога доспеваат приближно 1,5 милијарди евра домашни и еврообврзници. Министерството за финансии неодамна во целост ја исплати еврообврзницата од 500 милиони евра земена во 2018 година. Средствата за сервисирање на оваа обврска беа обезбедени преку заем од унгарската „Експорт-импорт банка“, со камата од 3,25 проценти, рок на отплата 15 години, со вклучен грејс период од три години.

Во моментов нема коментари за веста. Биди прв да коментира...

Остави коментар