Лидерите на Светскиот економски форум во Давос годинава дефинитивно се пооптимистични отколку на завршните панели на минатогодишниот форум, кога во фокусот беше можна нуклеарна ескалација на немирите од руско-украинскиот воен конфликт. Заклучоците од утринските панели ни ги пренесува Манус Крени од „Блумберг“.
Лари Самерс, поранешен американски министер за финансии, предупредува дека сегашната е слична на кризата од 1970-тите години, кога централните банки влегоа во слична борба со растот на цените преку каматните стапки.
Некои од панелистите го отворија прашањето и дека можеби централните банки треба да ја покачат целта од два на три проценти посакувана инфлација. Крени информира и за раст на загриженоста дека најлошите последици за економијата не се поминати, како и дека отворањето на економијата и ефектите од тоа реотворање на пазарот може да дојдат многу побрзо и многу поагресивно во споредба со другите играчи на пазарот, што може да донесе големо изненадување и за лидерите и за политиките.
Пораките од банкарите од централните банки и натаму се дека каматите треба уште да се зголемуваат. Тие велат дека не е завршено со зголемувањето на каматите и со надолниот притисок врз инфлацијата со таквите чекори. Но лидерите од технолошката индустрија и на некои комерцијални банки, на пример, велат дека мора да направат корекција на бројот на вработени поради преголемата вработеност до која дојде во време на пандемијата и предупредуваат на масовно кратење на работните позиции во тие сектори.
Се очекува во наредниот период инвестициските портфолија да се избалансираат меѓу изложеноста на кинескиот и американскиот пазар.
Целосниот извештај од Манус Крени од „Блумберг“ за претпладневните сесии на Светскиот економски форум во Давос погледнете го во видеото.
.webp){kind=icon}
