.webp){kind=icon}
Потрошувачките цени во САД нагло пораснаа во почетокот од годинава, што е знак за тврдоглавиот инфлаторен притисок што може да ги натера Федералните резерви (ФЕД) да ги зголемат каматните стапки за повеќе отколку што се очекуваше.
Индексот на потрошувачки цени порасна за 0,5 проценти во јануари, што е најмногу во последните три месеци, а на тоа влијаеја трошоците за енергија и домување, покажуваат податоците од Бирото за статистика, објавени денеска. На годишно ниво инфлацијата порасна за 5,6 отсто.
Базичната инфлација, која не ги вбројува во себе цените на храната и енергијата, во текот на минатиот месец порасна за 0,4 отсто и е поголема за 5,6 проценти споредено со истиот месец пред една година. Економистите на тој податок гледаат како на подобар показател за инфлацијата.
Просечните очекувања во рамките на истражувањето спроведено меѓу економистите од страна на „Блумберг“ предвидуваа месечен раст на цените од 0,5 проценти и зголемување од 0,4 отсто на базичната инфлација. Но и двата показатела на годишно ниво се поголеми од очекувањата на економистите.
Фјучерсите на американските акции ги избришаа добивките, а приносите на државните обврзници пораснаа по објавата на извештајот.
Бројките за инфлацијата, паралелно со извештајот за работна сила во јануари и знаците за отпорност на потрошувачите, нагласуваат дека економијата уште е силна, и покрај агресивната политика на ФЕД. Податоците ги нагласуваат неодамнешните тврдења на надлежните дека треба и натаму да се зголемуваат каматните стапки и да се држат на високо ниво уште некое време, а можеби дури и повисоки отколку што се очекуваше.
Патот до стабилните цени веројатно ќе биде и долг и полн со изненадувања. Падот на цените на суровините, кој предизвика намалување на вкупната инфлација во последните месеци, изгледа дека ја губи силата, а силниот пазар на работна сила и натаму претставува ризик дека платите и цените на услугите ќе растат.
Деталите од извештајот покажуваат дека трошоците за домување најмногу придонесуваат за месечниот раст. Цените на половните автомобили, како клучен двигател за падот на цените во последните месеци, се намалија веќе седми месец едноподруго. Цените на енергентите пораснаа за првпат во последните три месеци.
Трошоците за домување, кои се најголема компонента во услугите и чинат околу третина од вкупниот индекс на потрошувачки цени, минатиот месец пораснаа за 0,7 проценти.
