text size
Две клучни статистики покажаа постојани инфлациски притисоци во САД во последниве месеци, поткрепувајќи ја можноста за уште едно зголемување на каматните стапки од страна на Федералните резерви (ФЕД) следната недела.
Индексот на цените на трошоците за лична потрошувачка, не вклучувајќи ги тука храната и енергијата, како претпочитана мерка за базичната инфлација за ФЕД, во март се зголеми за 0,3 проценти во однос на претходниот месец и 4,6 отсто споредено со ланскиот март, покажа извештајот на Министерството за трговија, објавен денеска. ФЕД цели кон инфлација од два отсто за вкупната инфлација, но смета дека базичната инфлација е подобар показател за трендот на цените.
Во меѓувреме, мерката на Министерството за труд за трошоците за вработување, која ФЕД исто така внимателно ја следи, се зголеми за 1,2 отсто во првиот квартал споредено со претходниот, надминувајќи ги предвидувањата.
Bloomberg Mercury
Податоците за цените, особено во врска со зголемените трошоци за работна сила, ги зајакнуваат прогнозите дека креаторите на политиката на ФЕД ќе ја зголемат референтната каматна стапка уште за четвртина процентен поен на состанокот што ќе се одржи следната недела.
Иако годишната инфлација го достигна врвот, патот назад до целта на централната банка од два отсто се покажува трнлив.
Една од предностите во извештајот на цените на трошоците за лична потрошувачка е забавувањето во внимателно следената мерка на трошоците за услуги. Цените на услугите, не вклучувајќи ги домувањето и енергетски услуги, што е клучен мерач според претседателот на ФЕД, Џером Пауел, во март, според пресметките на „Блумберг“, се зголемија за 0,2 отсто. На годишно ниво, пак, оваа мерка е зголемена за 4,5 проценти. Постои загриженост за инфлацијата во услужниот сектор, делумно поради силниот раст на платите во тие индустрии, што претставува ризик да се задржи растот на цените во скоро време над целта на ФЕД. Претставниците на централната банка се поделени во својата процена за влијанието на зголемувањето на платите врз инфлацијата.
Индексот S&P 500 порасна, приносите на двегодишните обврзници флуктуираа, а доларот остана посилен. Трошоците за работна сила во САД се зголемија за најмалку еден отсто во седум квартали по ред, продолжувајќи го тоа што веќе беше рекордна низа во податоците од 1996 година, покажуваат податоците на Министерството за труд.
Што вели „Блумберг економикс“?
„Податоците силно поддржуваат уште едно зголемување од 25 базични бода на состанокот на ФЕД на 2 и 3 мај, па дури и може да убедат некои креатори на политики на ФЕД дека стапките сè уште не се на доволно рестриктивно ниво. Наша основна процена беше дека ФЕД ќе оди на продолжена пауза по покачувањето на каматните стапки следната недела, но сега гледаме сè поголем ризик дека можеби ќе треба да направат повеќе“, вели Ана Вонг, главна американска економистка на „Блумберг економикс“ (Bloomberg Economics).
Додека силниот пазар на трудot и вишокот заштеди им обезбедија на домаќинствата средства за трошење, потрошувачите почнуваат да ја губат силата. Трошоците за лична потрошувачка, приспособени на цените, минатиот месец стагнираа, одразувајќи го намалувањето на трошоците за стоки и услуги, по надолно ревидираниот пад од 0,2 отсто во февруари.
Намалувањето на потрошувачките трошоци сугерира дека домаќинствата стануваат повнимателни и ги намалуваат дискрециските купувања. Иако силниот пазар на трудот, постојаниот раст на платите и вишокот заштеди ја зајакнаа потрошувачката во услови на раст на цените, податоците укажуваат дека моментот исчезнува.
.webp){kind=icon}
