.webp){kind=icon}
Според најновата анализа за напредокот на еднаквите плати меѓу половите, светската економија секоја година губи најмалку седум билиони долари поради неуспехот да се постигне рамноправна позиција меѓу мажите и жените на пазарот на трудот.
Истражувањето го спроведе агенцијата „Мудис“ (Moody's Analytics) во земји што се членки на Организацијата за економска соработка и развој (ОЕЦД), под претпоставка дека не постои родов јаз на пазарот на трудот, како и во раководните структури.
И покрај ова, 38-те земји-членки на ОЕЦД, меѓу кои се и некои од најразвиените економии во светот, како што се САД, Велика Британија и Јапонија, заостануваат во напорите да се постигне еднаква плата за жените.
Неодамнешниот извештај на американскиот истражувачки центар „Пју“ (Pew Research Center) покажа дека паритетот на платите во САД стагнирал во последните две децении. Во 2022 година, жените во просек оствариле 82 отсто од заработката во споредба со мажите. Во 2002 година овој диспаритет изнесувал 80 отсто од заработката на штета на жените во споредба со мажите. Во Европската Унија можеби во 2086 година жените ќе дочекаат плати еднакви на своите машки колеги.
„Постигнат е напредок, но ни приближно доволно брз“, вели Даун Холанд, директорка за економски истражувања во „Мудис аналитикс“ и коавторка на извештајот. Таа додаде дека „има многу сложени прашања зад овие родови разлики“, како што се општествените норми, за кои е потребно долго време да се променат.
Разликата е уште поочигледна меѓу раководната структура, каде што само 23 отсто од жените се на раководни позиции, според „Мудис аналитикс“. Иако кај жените постои многу поголема веројатност да направат дополнителни инвестиции во образованието, сепак постои тенденција тие да добиваат сè послабо платени работни места, се наведува во извештајот.
Авторите на извештајот се оградуваат и предупредуваат дека станува збор за процени, но наведуваат дека родовиот паритет на пазарот на трудот за лицата на возраст од 25 до 64 години во земјите на ОЕЦД може да го зголеми глобалното економско производство за 6,2 отсто. „Доколку уделот на женските менаџери се зголеми и се изедначи со мажите, тоа ќе доведе до дополнителни 0,7 отсто раст“, велат тие.
Холанд посочува дека мерките како што е платеното породилно отсуство за мајките и татковците, како и подостапната грижа за децата, би можеле да помогнат да се намали јазот меѓу половите, што укажува на тоа дека светот можеби е на пресвртница. „Еднаквоста е на некој начин во фокусот на сите земји, како што никогаш досега не била“, заклучи таа.
