.webp){kind=icon}
Намалувањето на каматните стапки од страна на Федералните резерви (ФЕД) подоцна оваа година би било предоцна за да се зголемат акциите и обврзниците на високозадолжените компании, бидејќи пристапот до финансирање веќе станува рестриктивен во пресрет на глобалните банкарски превирања, велат инвестициските стратези.
Финансиските услови во САД од почетокот на овој месец се на најлошото ниво од мај 2020 година, по колапсот на трите американски кредитори и кризата на „Кредит Суис“ (Credit Suisse Group AG). Во последното истражување американските банки објавија заострување на условите за кредити.
„Дури и ако ФЕД ги намали стапките, кредитните маржи ќе се прошират и, што е уште поважно, кредитите нема да не бидат лесно достапни и ќе бидат скапи за компаниите, вклучувајќи ги и азиските компании што ги враќаат долговите во американски долари. Би ги избегнал финансиите и компаниите со многу долгови во американски долари“, рече Редмонд Вонг, стратег во „Саксо“ (Saxo Capital Markets HK Ltd).
Таквата претпазливост ја одразува зголемената загриженост дека одлуката на ФЕД за користење калибрирано монетарно затегнување за да ја задржи инфлацијата, а сепак да избегне рецесија или финансиска нестабилност, може да резултира со контраефект. Последната банкарска криза ги засили овие грижи, додека претседателот на ФЕД сигнализираше дека се очекуваат нови зголемувања на стапките и дека официјалните лица не очекуваат промена на политиката оваа година.
Финансиските пазари, сепак, ги удвоија облозите за намалување на стапката, при што се очекува ефективната стапка на фондовите на ФЕД да падне на околу 4,2 проценти во декември од сегашниот опсег меѓу 4,75 и 5 проценти.
„ЏП Морган асет“ (JPMorgan Asset Management) ја намали изложеноста на долгови со висок принос и одлучи да се фокусира на побезбедни корпоративни обврзници за инвестиции, бидејќи очекува рецесија во САД, според Кери Крег, стратег за глобален пазар во фирмата. Што се однесува до акциите, менаџерот на фондот од 2,5 илјади милијарди долари фаворизира акции со силни биланси, кои се изолирани од повисоки трошоци за задолжување и безбедни сектори што можат подобро да ја издржат рецесијата, особено здравството и комуналните услуги.
„Тоа се сектори што се помалку чувствителни на инфлацијата и изгледите за раст. Исто така, одбираме некои од поголемите технолошки акции со мегакапитализација, се позиционираме во побезбедни делови на технолошкиот пазар“, рече Крег.
„Стресот во американскиот банкарски сектор го забрза заострувањето на условите за кредитирање, што може да доведе до рецесија“, рече Четан Сет, азиско-пацифички стратег за акции во „Номура“ (Nomura Holdings Inc).
„Веројатно е дека заострувањето на стандардите за кредитирање на банкарскиот сектор може да изврши надолен притисок врз давањето кредити, а со тоа и врз економскиот раст на САД во месеците што следуваат, забрзувајќи го патот кон веројатната американска рецесија“, рече Сет.
