.webp){kind=icon}
Шефовите за финансии на Групата седум (Г7) по тридневни развовори донесоа одлука за поголема помош за Украина, формираа нова иницијатива за синџирите на снабдување и ветија дека ќе ги пополнат регулаторните празнини во банкарскиот сектор во знак на единство во однос на глобалните гео-економски прашања.
„Повикуваме на итен прекин на нелегалната војна на Русија против Украина, што ќе расчисти една од најголемите несигурности околу глобалната економска перспектива“, посочија тие во изјава по нивниот собир во Нигата, Јапонија.
Помошта за Украина до почетокот на 2024 година е зголемена до 44 милијарди долари, со што му овозможи на Меѓународниот монетарен фонд (ММФ) да одобри поддршка од 15,6 милијарди долари во текот на четири години.
Лидерите, исто така, ја истакнаа потребата да се остане „агилен и флексибилен“ во однос на економската политика во услови на зголемена неизвесност за глобалната економија.
Централните банки „ќе обезбедат инфлациските очекувања да останат добро закотвени и јасно ќе ги соопштуваат ставовите во поглед на политиката за да помогнат во ограничувањето на негативните прелевања меѓу земјите“, се додава во коминикето.
Министрите за финансии и гувернерите на централните банки од САД, Британија, Франција, Германија, Италија, Канада и Јапонија немаа проблем да се договорат за широк спектар на теми, од проблемите на банкарскиот сектор до реструктуирање на долгот, а сето тоа беше соопштено во долго коминике кое во голема мера било напишано пред средбата, според луѓе запознаени со случувањата.
Во соопштението се нуди одредена поддршка за настојувањето на САД да се намали зависноста од синџирот на снабдување од Кина, а истовремено да се допре до Глобалниот југ за да се покаже дека групата богати нации може да преземе конкретни активности во нивна корист додека Г-20 се бори со поделени мислења.
Официјални лица од економиите во развој како Индија, Бразил и Индонезија беа присутни на разговорите. Иако не е невообичаено земји кои не се членки да присуствуваат на самитите на лидерите на Г7, ова е прв пат од 2009 година да се упатуваат покани до финансиските шефови.
Финансиска стабилност
Потребата да се обезбеди глобална финансиска стабилност беше истакната тема по колапсот на банките „Силикон валеј“ (СВБ) и „Фрст рипаблик“ (First Republic) и преземањето на „Кредит Суис“ (Credit Suisse). Иако влијанието врз економиите и финансиските системи на земјите од Г7 е ограничено „не е време за самозадоволство“, рече шефот на германската централна банка, Јоаким Нагел, во интервју за време на состаноците.
„Ги поддржуваме тековните напори на Одборот за финансиска стабилност, вклучително и рамката за прудентност и посветеност на банките, да ги извлече лекциите научени од неодамнешните случувања и да постави приоритети за неговата работа во иднина, за подобрување на финансиската стабилност“, се вели во соопштението.
Најдобрите креатори на економска политика во светот посочија дека внимателно ќе ги следат случувањата во банкарскиот сектор и „ќе бидат подготвени да преземат соодветни активности“ за одржување на финансиската стабилност. Финансискиот систем останува „отпорен“ и креаторите на политики ќе работат на тоа „да се решат празнините во податоците, надзорот и регулативата“ во банкарскиот свет.
Министрите за финансии и гувернерите на централните банки, исто така, рекоа дека ќе ги решат ранливостите во небанкарското финансиско посредување и ќе се соочат со прашањата за ликвидноста во отворените фондови.
Синџири за снабдување
Трговските нарушувања беа исто така високо на списокот на приоритети на состанокот, со имплицитен поглед кон Кина. Шефовите на финансии предложија ново партнерство што ќе биде отворено за други земји, како што претходно објави „Блумберг њуз“.
Тие имаат за цел да започнат партнерство за еластично и инклузивно подобрување на синџирот на снабдување, или РИСЕ (RISE), најдоцна до крајот на оваа година.
Тоа укажува на зголемена загриженост во редовите на Г7 за Кина, со оглед на нејзината улога во снабдувањето и производството за глобалната економија. Додека САД се залагаат за намалување на зависноста од Кина, некои европски земји презедоа поблаг пристап.
Економскиот комесар на Европската унија, Паоло Џентилони, предупреди дека одвојувањето од Кина претставува ризик за глобалната трговија.
„Она за што зборуваме не е затворање на нашата трговија со Кина, туку правење на нашите синџири на снабдување побезбедни во некои стратешки сектори како ретките минерали“, рече Џентилони во интервју на маргините на собирот.
Глобален југ
За да се изгради консензус надвор од Г7, шефовите на финансии претпазливо вклучија други земји во разговорот од сесијата посветена на ветувања за поголема поддршка за земјите со пониски и средни приходи.
Во коминикето се наведени Замбија, Етиопија и Гана како земји кои неодамна постигнале или се очекува да забележат одреден напредок според таканаречената Заедничка рамка на Г-20.
Заедничката изјава дава акцент на неодамнешните случувања за договорот со Шри Ланка предводен од Јапонија, Франција и Индија. Трите земји претседавачи во вторникот беа домаќини на виртуелна сесија на инаугуративната средба на доверителите, на која учествува 26 земји. Кина, која е најголемиот билатерален заемодавец на Шри Ланка и беше во судир со другите доверители, присуствуваше како набљудувач.
