Кинеските акции бележат натамошен раст откако Пекинг неочекувано го преполови задолжителниот карантински период, означувајќи клучна промена од владината фиксација за „нулата ковид“ што ги замати изгледите за инвеститорите.
Индексот CSI 300 денеска затвори за 1 отсто повисоко, поставувајќи го мерачот од најниското ниво во април, на добивка од 19 отсто - меѓу главните одредници со најдобри перформанси во светот во тој период. Индексот Hang Seng во Хонгконг ја избриша претходната загуба за да затвори за 0,9 отсто повисоко. Валутите зајакнаа во Тајланд и Австралија - земји кои сметаат на Кина за туристи и трговија.
Bloomberg
Потегот на Кина да го намали периодот за карантин при влез, од три недели на 10 дена ја покажува зголемената загриженост на властите за економскиот биланс од строгите ограничувања поради вирусот. Промената ќе го поттикне оптимизмот на инвеститорите дека заедно со поддршката од монетарната и фискалната политика, кинеските акции ќе продолжат да имаат добри перформанси, додека останатите глобални играчи се под притисок на зголемените каматни стапки.
„Оваа релаксација испраќа сигнал дека економијата е на прво место. Тоа е знак за важноста на економијата во овој момент“, рече Ли Чангмин, управен директор во Snowball Wealth во Гуангжу.
Решеноста на Кина да го искорени коронавирусот по секоја цена е клучна одредница за изгледите во економијата. Со оглед на тоа што денешната најава се смета дека најверојатно ќе поттикне закрепнување на втората по големина економија во светот, и другите сфери добија поттик.
Фјучерс договорите на S&P 500 се тргуваа за 0,6 отсто. Јуанот, исто така, ги збриша загубите за да се зголеми и на офшор и на копнените пазари.
„Народната банка на Кина ветува дека ќе ја поддржува монетарната политика за да го помогне закрепнувањето на економијата“, рече гувернерот Ји Ганг во коментар во ретко интервју за државната телевизија објавено во понеделникот. Олеснувањето на заклучувањата во Шангај и Пекинг, исто така, го поттикна напредокот.
И со инфлација нешто над 2 отсто, за разлика од повеќе од 8 отсто во САД, Народната банка на Кина е во добра позиција што им овозможува на властите да се фокусираат на стимулација.
„Оваа вест сугерира дека можеби властите нема да бидат толку строги со контролите за ковид како што се очекуваше“, вели Џејн Фоли, стратег во Rabobank во Лондон.
„Вестите, исто така, се совпаѓаат со извештаите дека Народната банка ветува оти ќе ја поддржува монетарната политика“, рече таа, осврнувајќи се на последниот коментар на гувернерот Ји Ганг.
„Сето ова сугерира потенцијално пооптимистичка перспектива за кинеската економија, што е добра вест генерално за извозниците на стоки како Австралија и сите трговски партнери на Кина“, додава Фоли.
.webp){kind=icon}