Реформскиот пакет на аргентинскиот претседател Хавиер Милеи извојува значајна победа, бидејќи Сенатот го одобри неговиот т.н. омнибус-закон и ратификува неколку поглавја во вториот круг на гласање.
По неколкунеделни напнати преговори, сенаторите го усвоија планот на претседателот наклонет кон пазарот на гласање во средата вечер, откако заменик-претседателката Викторија Виљаруел придонесе за надминување на ќор-сокакот со резултат 36-36.
Тие исто така ги одобрија првите шест поглавја од нацрт-законот, кои вклучуваат реформа на трудот, приватизација и давање на Милеи извонредни овластувања над економската политика, во вториот круг на гласање со слично тесна разлика.
Ваквите одобренија се чини дека го ставаат Милеи во позиција за законодавно достигнување, за кое инвеститорите веројатно ќе навиваат. Иако нацрт-законот помина низ значителни ревизии и компромиси, тој содржи мерки дизајнирани да ја направат земјата попривлечна за работодавците и деловните интереси.
Напредокот покажува дека Милеи може да носи закони и покрај неговиот непријателски однос со членовите на Конгресот, кои тој продолжува да ги омаловажува.
„Администрацијата на Милеи ја обезбеди својата прва законодавна победа, и покрај ограниченото претставување во Конгресот“, рече Диего Переира, економист во „ЏП Морган“ (JPMorgan).
Вториот круг на гласање во Сенатот, познат како специјално гласање, продолжи во четвртокот рано наутро. Тргувањето со државни обврзници и поврзаните свопови се затвори како што напредуваше предлог-законот.
Друг предлог-закон, фокусиран на фискалната политика, исто така чека гласање во Сенатот. Доколку и двата нацрт-закона бидат одобрени, тие ќе се вратат во Долниот дом, каде што пратениците со големо мнозинство ги усвоија кон крајот на април, пред да бидат направени измени во Сенатот.
„Ова е позитивен развој на настаните за инвеститорите, кои сè уште се во позиција на штрек со Аргентина“, рече Марсело Гарсија, директор за политички ризик во Латинска Америка во консултантската компанија „Хорајзон енгејџ“ (Horizon Engage). „Тесниот исход од ова гласање во Сенатот значи дека владата на Милеи ќе мора да продолжи да ги развива своите почетни преговарачки вештини“, додаде тој.
Отпорот кон реформите на Милеи ескалира пред Конгресот во средата попладне, додека демонстрантите фрлаа камења и молотови коктели врз полицијата, која со водени топови и солзавец се обидуваше да исчисти дел од блискиот плоштад.
Демонстрантите превртеле и запалиле автомобил. Десетици луѓе се приведени, а најмалку девет се хоспитализирани, меѓу кои и неколку члена на Долниот дом на Конгресот, објавија локалните медиуми. Демонстрациите беа придружени со удирање по тенџериња низ целиот главен град, кога падна мрак.
Партијата на Милеи претходно во средата го измени нацрт-законот за да ги зголеми своите шанси (на гласањето) - меѓу другото, со отстранување на државната авиокомпанија „Аеролинеас Аргентинас“ (Aerolineas Argentinas) од списокот на фирми подобни за приватизација.
Контроверзниот текст претходно го загрози целото поглавје од законот за приватизација, кое се однесува и на енергетските и транспортните фирми.
Инаку, партијата на аргентинскиот претседател има само седум од 72 места во Горниот дом. Спротивно на тоа, перонистите имаат 33 сенатори.
.webp){kind=icon}
Во моментов нема коментари за веста. Биди прв да коментира...