.webp){kind=icon}
Мароко, охрабрено од неодамнешното странско признавање на неговото владеење над Западна Сахара, планира да го удвои производството на зелена електрична енергија на спорната територија за да ја задоволи сѐ поголемата побарувачка пред да биде кодомаќин на Светското првенство во фудбал во 2030 година.
Владата постави краен рок до 2027 година за изградба на нова ветерна електроцентрала и соларни капацитети во регионот со моќност од 1,4 гигавати, рече претставник на Министерството за енергетика, кој побара да остане анонимен поради чувствителноста на темата. Проектите најверојатно ќе чинат околу 21 милијарда дирхами (2,1 милијарди долари), а ќе ги водат локални и странски приватни инвеститори, посочува официјалниот претставник.
Владеењето на Мароко со територијата, голема речиси колку Обединетото Кралство, е оспорено од страна на Фронт Полисарио, вооружено движење што се залага за независност, поддржано од соседен Алжир во конфликтот од пред речиси пет децении. Но неодамнешните изјави за поддршка од Франција, Шпанија и од САД го охрабрија Мароко да ги засили инвестициите во енергетската инфраструктура и во земјоделството, меѓу другите области.
Сегашниот капацитет на зелена енергија на Западна Сахара изнесува околу 1,3 гигавати, што претставува околу една четвртина од вкупниот капацитет на земјата за обновливи извори на енергија. Проектот за развој на кабел од три гигавати што ги поврзува постројките за обновливи извори на енергија на тоа подрачје со централно Мароко привлече особен интерес од приватни инвеститори, рече официјалниот претставник.
Таа иницијатива е исто така клучна за да се задоволи зголемената побарувачка за електрична енергија низ северноафриканската земја пред фудбалскиот турнир во 2030 година, на кој Мароко ќе биде домаќин заедно со Шпанија и Португалија.
Франција во април објави дека ќе помогне со финансирање на кабелскиот проект, а тоа се случи само три месеци пред Париз да го признае суверенитетот на Мароко над Западна Сахара.
Најновите енергетски планови веројатно ќе бидат осудени од Полисарио. Фронтот повеќепати ја оспорува, како што ја нарекува, нелегалната експлоатација на природни ресурси на територијата од страна на Мароко, вклучувајќи ги и фосфатите.
