Државниот совет на Кина во неделата одобри изградба на 10 нови нуклеарни реактори, потврдувајќи ја нуклеарната енергија како клучен дел од енергетската транзиција кон почисти извори на енергија.
Ова е четврта година по ред како Кина одобрува најмалку 10 нови реактори. Во моментов има 30 реактори во изградба, што претставува речиси половина од вкупниот број во светот, а се очекува до крајот на деценијата да ги престигне САД и да стане најголем производител на нуклеарна енергија во светот.
Според локалниот медиум „Пејпер“ (The Paper), овие 10 нови реактори ќе чинат вкупно 200 милијарди јуани (27 милијарди долари). Четири реактори ѝ се доделени на компанијата ЦГНП (China General Nuclear Power Corp.), кои ќе бидат поставени во постројките Фангченганг и Тајшан. ЦНН (China National Nuclear Corp.), СПИ (State Power Investment Corp.) и ЦХГ (China Huaneng Group Co.) добија одобренија за по два реактора.
Цените на акциите на неколку кинески нуклеарни компании пораснаа во понеделникот, на отворањето на тргувањето, а акциите на ЦГНП во Хонгконг скокнаа за 4,1 проценти.
Се очекува кинескиот нуклеарен капацитет да достигне 65 гигавати до крајот на 2025 година, според податоците на Кинескиот совет за електрична енергија, во споредба со помалку од 60 гигавати минатата година. Според извештајот што во неделата го објави Кинеската асоцијација за нуклеарна енергија, до 2040 година Кина треба да достигне 200 гигавати капацитет, што ќе претставува околу 10 отсто од вкупното производство на електрична енергија.
Клучот за остварување на тој план ќе биде одржувањето контрола на трошоците. Цената од 2,7 милијарди долари по реактор значително се разликува од неодамнешните проекти во САД и во Европа, кои се погодени од доцнења и надминувања на трошоците. Во Обединетото Кралство два реактора во изградба на локацијата Хинкли поинт Ц се очекува да чинат вкупно 47,9 милијарди фунти (63,7 милијарди долари).
Кина има предност со државниот систем, кој на предводниците на проекти им овозможува пристап до кредити по ниски каматни стапки - што е клучно со оглед на тоа што поголемиот дел од трошоците за нуклеарна електрана доаѓа од почетната изградба. Постојаната низа нови проекти овозможува созревање на снабдувачките синџири и стекнување искуство на градежните екипи, со што се намалува ризикот од скапи доцнења.
.webp){kind=icon}
Во моментов нема коментари за веста. Биди прв да коментира...