Маврициус сака да ги привлече богаташите и да ја смени репутацијата на даночен рај

Маврициус се појавува како еден од најбрзорастечките пазари на богатство во светот, со прогноза за двојно зголемување на неговата милионерска популација до 2033 година. Сега островската нација работи на искористување на бумот и отстранување на својата репутација како даночен рај.

Новата влада, која е на власт од ноември, им се додворува на семејните компании, менаџерите за богатство и финтек-фирмите во обид да ја диверзифицира економијата од 14,6 милијарди долари надвор од туризмот и недвижностите.

„Можете да нè наречете јурисдикција со ниски даноци или јурисдикција со ефикасни даноци“, рече Џјоти Џитун, министерка за финансиски услуги и економско планирање. „Но, ние не сме даночен рај“.

Сепак, перцепцијата и натаму опстојува. Околу 2,3 проценти од глобалните текови во даночните раеви минуваат низ Маврициус, според Мрежата за даночна правда. И земјата останува една од најконкурентните даночни јурисдикции во светот: највисока стапка на данок на личен доход од само 20 проценти, без данок на капитална добивка или наследство и рамна стапка на корпоративен данок од 15 отсто за повеќето компании - со ослободувања до 95 проценти што се достапни за некои фирми.

Маврициус исто така нуди програма за златна виза, со која им се одобрува престој на странците што ќе купат имот во вредност од најмалку 375.000 долари во одредени развојни проекти, ако инвестираат минимум 50.000 долари во бизнис или - доколку се пензионирани - префрлаат најмалку 18.000 долари годишно на локална банкарска сметка.

Во текот на изминатата деценија во земјата се преселиле околу 1.500 богати иселеници, првенствено од Јужна Африка, Франција, Кина и Европската Унија (ЕУ). И трендот на раст ќе продолжи. Според податоците на „Хенли енд партнерс“ (Henley & Partners) и „Њу ворлд велт“ (New World Wealth), милионерската популација на земјата, која моментално се проценува на 5.100, се предвидува до 2033 година да порасне за 95 проценти.

Сепак, Маврициус се соочува со скептицизам во врска со својот статус како офшор финансиски центар, рече Шамима Малам-Хасам, генерална директорка на „Тридент траст“ (Trident Trust Co.) и претседателка на индустриската лобистичка група „Маврициус фајнанс“ (Mauritius Finance). Поединците со висока нето-вредност, додаде таа, стануваат „сè повнимателни во врска со репутациските ризици поврзани со локациите за нивните вложувања“.

И покрај тоа, постојаниот прилив на богатство почна да ја преобликува малата островска нација - долго позната по своите кристално чисти води, бели песочни плажи и луксузни одморалишта - во игралиште за ултрабогатите.
Луксузни станбени објекти се прошируваат од Ле Морн на југ до Гранд Беј на север - најбогатиот крајбрежен град во Африка - каде што врвните станови сега се продаваат за просечно 5.000 долари по квадратен метар. Минатата година недвижностите учествуваа со 73 проценти од вкупните странски директни инвестиции, додека во периодот од 2021 до 2023 година изнесуваа во просек 52 отсто, покажуваат податоците од централната банка.

„Гледаме поголема побарувачка од странци што сакаат да се преселат на Маврициус, како и за долгорочни изнајмувања“, рече Дејвид Марсијал, извршен директор на кластерот за недвижности на „Алтео“ (Alteo Ltd.). Компанијата, која го разви „Анахита Маврициус“ (Anahita Mauritius) - луксузен имот со два хотела со пет ѕвезди, приватна плажа и два шампионски терени за голф - планира да инвестира 14 милијарди рупии (303 милиони американски долари) во соседен имот, кој ќе се намени за живеење со клуб на плажа, бродски клуб и приватно училиште.

Bloomberg Mercury

 

Сè поголем број одморалишта сега нудат брендирани резиденции со услуги како рецепција и содржини како хотелски погодности, вели Џонатан Таг, директор на „Пам голдинг пропертис Маврициус“ (Pam Golding Properties Mauritius). Минатата година агенцијата на едно европско семејство продаде вила на плажа со шест спални соби за рекордни 13,6 милиони долари. Имотот беше дел од приватен имот развиен од „Уан енд онли Ле Сен Жеран“ (One&Only Le Saint Géran), а поддржан од „Керзнер интернешнал“ (Kerzner International), фирмата што стои зад „Атлантис Палм“ (Atlantis The Palm) во Дубаи.

Во време на бум, од Одборот за економски развој на Маврициус, кој ги проверува купувањата на имоти од страна на странците, велат дека длабински ја засилиле проверката. „Пазарот на недвижности е многу безбеден и досега немавме ниту една трансакција каде што некој вклучен во нелегална активност го поминал тестот“, рече заменик-извршниот директор Сачин Мохабир. „Единствено може да се случи лицето да било чисто, но подоцна да имало проблеми“.

Bloomberg Mercury

 

Растот на потрошувачката на луксузни производи се протега надвор од недвижностите.

„Јахт менаџмент“ (Yacht Management), трговец со луксузните чамци „бенето“ (Bénéteau), повеќе од 20 години продава пловила со должина помеѓу девет и 12 метри. Клиентите сега бараат поголеми и јахти по нарачка, кои чинат над еден милион долари, изјави генералниот директор Бертран Харди.

Во меѓувреме, единицата „Аксес“ (Axess) забележа повеќе од двојно зголемување на продажбата на „Ленд ровер“ (Land Rover) во седумте години до 2024 година, според генералниот директор Стефан Шасто де Бајон. Купувачите, рече тој, се подготвени да чекаат со месеци за конфигурации по нарачка.

Освен за подобрување на животниот стил, се очекува растечкото присуство на богати поединци да го поттикне секторот за финансиски услуги, кој веќе сочинува околу 14 проценти од бруто-домашниот производ (БДП).
Поединци и компании веќе се привлечени од меѓународниот финансиски центар на земјата, кој има корист од хибридниот англиско-француски правен систем, рече Матиу Лехеј, кој раководи со „Инвестек велт енд менаџмент Маврициус“ (Investec Wealth & Investment Mauritius Ltd).

Сепак, Маврициус ќе се соочи со конкуренција од попознатите центри за богатство. Според „Сејвилс“ (Savills), Дубаи и Абу Даби се појавија како главни дестинации за најбогатите поединци во светот што сакаат да се преселат - по што следуваат Сингапур, Цирих и Окленд. Само финансискиот центар на Дубаи е дом на семејни канцеларии што управуваат со средства во вредност од над еден трилион долари.

Социјални трошоци

Поттикот за подинамичен финансиски сектор следува по ревизијата што откри погрешни пресметки во фискалната рамка на претходната влада. Се очекува премиерката Навинчандра Рамгулам, која е и министерка за финансии, во јуни да претстави нов буџет и економска стратегија.

Сепак, растечкиот буџетски дефицит и зголемените фискални притисоци би можеле да го ограничат опсегот на стимулации дизајнирани да привлечат богати иселеници.

Дури и додека влегува странското богатство, економските добивки не се рамномерно распределени. Во многу делови од земјата инфраструктурата останува неразвиена, со еднонасочни патишта што се извиваат низ рибарски села и плантажи со шеќерна трска. Одливот на мозоци продолжува бидејќи локалните дипломци се селат во странство за работа, а инфлацијата на недвижностите ја поттикнува нееднаквоста.

„Овие случувања донесоа видливи социјални трошоци“, рече Маниша Дукони, претседател на „Мајндекс“ (Mindex Ltd.), посочувајќи на порастот на затворените заедници и проширувањето на економските поделби. Таа се залага за фонд за придонеси што би ги принудил богатите новодојденци да помогнат во поддршката на социјалните иницијативи.

Bloomberg Mercury

 

Маврициус исто така го проширува својот фокус надвор од традиционалните партнерства. Речиси четири децении по потпишувањето на даночниот договор со Индија - договор што помогна во воспоставувањето на секторот за финансиски услуги и придонесе за репутацијата на земјата како даночен рај - поранешната холандска, француска и британска колонија сега работи на продлабочување на врските низ цела Африка.

Со неколку од најбрзорастечките економии во светот, континентот претставува голема можност. Како една од ретките африкански нации „на белата листа“ на Работната група за финансиска акција, Маврициус се позиционираше како канал за капитал што се движи во и надвор од континентот.

Владата сега има цел да привлече финансиски конгломерати од цела Африка за да воспостават операции - вклучувајќи и регионални седишта - за да го опслужуваат поширокиот континент, рече заменик-министерот за финансии Данешвар Дамри. „Секторот за финансиски услуги на Маврициус ќе има многу важна улога како двигател и катализатор за Африка“.

 

Во моментов нема коментари за веста. Биди прв да коментира...

Остави коментар