Овие дестинации ќе изгубат половина од сончевите денови до 2100 година

Пролетта е во полн ек во Северна Америка и Европа, а многу луѓе вечераат надвор во дворови, возат велосипеди по патеки обложени со цвеќиња и уживаат во пловењето со чамец. Станува збор за сцена на пријатно време, кое, сепак, ќе му отстапи место на уште еден рекордно топол летен бран - предвидуваат научниците.

Ако се чини дека овој период на пријатни температури е краткотраен, има причина за тоа, барем во некои делови од светот.

До крајот на векот, жителите на северните земји генерално ќе доживеат потопло време во првите денови на зимата. Спротивно на тоа, оние на југ - регионот околу екваторот и кон Јужна Европа и САД - генерално ќе уживаат во помалку денови со пријатни температури во текот на годината.

До овие заклучоци дојде иновативна студија на Технолошкиот институт во Масачусетс, објавена во списанието „Журнал оф клајмет“ (Journal of Climate) во март, која ги предвидува долгорочните ефекти од климатските промени врз одредени дестинации низ светот. Истражувањето комбинира податоци од 50 климатски модели за да ги посочи начините на кои „деновите на отворено“ (умерени температури погодни за престој надвор) ќе бидат нумерирани на различни дестинации до 2100 година.

Импликациите се огромни и се однесуваат на квалитетот на животот, патувањето и туризмот.

„Промените во бројот на денови на отворено директно ќе влијаат на тоа како луѓето низ светот ги перципираат климатските промени“, рече Елфатих Елтахир, професор по инженерство за животна средина на Технолошкиот институт, кој ја водеше студијата.

Победници и губитници

„Русија, Канада и другите земји на глобалниот север ќе добијат повеќе денови на отворено во иднина“, вели Јеонву Чои, истражувач во Технолошкиот институт во Масачусетс и член на истражувачкиот тим. „Од друга страна, земјите во развој како Брегот на Слоновата Коска ќе имаат помалку денови на отворено, така што постои јасна разлика помеѓу глобалниот север и глобалниот југ“.

Заклучоците од студијата се во согласност со фактот дека влијанијата на климатските промени ќе бидат поизразени на глобалниот југ, и покрај тоа што земјите од југот помалку придонеле за загадувањето предизвикано од човекот, односно за ефектите на стаклена градина.

Иако најавените промени многу повеќе ќе ги погодат жителите на тие дестинации отколку туристите, треба да размислиме и како климата ќе ја промени самата природа на туристичките места. Пред сè, ова се однесува на тоа каде и кога да се патува, но и на економиите на земјите што се потпираат на туризмот.

Имајќи го ова на ум, направивме графика заснована на податоци од институтот, која покажува како ќе се променат деновите на отворено во најпосетуваните туристички дестинации во светот (рангирана од туризмот на ОН во 2022 година). Кога станува збор за САД, графиконот ги вклучува двете најпосетувани сојузни држави, тоа се Калифорнија и Флорида.

Гледајќи подалеку од најпосетуваните земји, одредени тенденции остануваат валидни за другите делови на планетата. Најголеми влијанија се очекуваат во тропските дестинации. На пример, Доминиканската Република ќе има 124 дена помалку на отворено до 2100 година, а во текот на целата година умерената температура ќе се намали за 50 проценти.

Мексико, Индија, Тајланд и Египет, земјите што се наоѓаат на северната хемисфера, ќе се соочат со намалување на бројот на денови со умерена температура (од 55 до 86 дена годишно). Обединетите Арапски Емирати ќе ги претрпат и ефектите од климатските промени: се очекува да изгубат 85 пријатни денови во годината, не сметајќи го можното зголемување на поројните дождови што предизвикаа невиден метеж на аеродромот во Дубаи во април.

Спротивно на тоа, Франција, Обединетото Кралство, Германија и Австрија ќе добијат од 18 до 60 дена на отворено до 2100 година, главно поради потоплите зими - исто така „несакани“ за скијачката индустрија. Во Медитеранот, Грција се проценува дека ќе изгуби повеќе од 30 дена на отворено поради топлите летни температури од мај до септември.

О'Шенон Барнс, консултантка за одржлив туризам и програмска менаџерка во Центарот за одржливи глобални претпријатија на Универзитетот „Корнел“, вели дека ова е првпат да наиде на студија што ги зема предвид деновите на отворено за да ги нагласи влијанијата на климатските промени.

„Ова навистина покажува колку длабоко климатските промени ќе влијаат на туристичкиот сектор“, вели таа, нагласувајќи ја важноста од планирањето на климатските активности за туризмот.

Доколку сакате да дознаете како ќе влијае климата на промената на бројот на пријатни денови во вашата земја, можете да ја користите оваа страница. Дополнително, опцијата SSP1-2.6 го претставува најоптимистичкото сценарио, а опцијата SSP5-8.5 е за истражување на најмрачните случувања.