.webp){kind=icon}
Двете најголеми економии од регионот на Персискиот залив се соочуваат со голем инфлациски притисок, додека бизнис активностите се зголемуваат.
Растот на саудиската ненафтена економија достигна највисоко ниво во последните 10 месеци, при што индексот S&P за набавки во кралството се зголеми на 57,7 од 56,3 во јули. Тој индекс за Обединетите Арапски Емирати (ОАЕ) се искачи на 56,7, од 55,4 бодови.
Падот на цените на горивата во ОАЕ придонесе за првото намалување на трошоците за увоз во земјата од јануари 2021 година.
"Податоците нудат надеж за другите земји кои се борат со постојана инфлација, иако останува загриженоста дека глобалните ограничувања на енергетските снабдувања ќе продолжат да ги зголемуваат цените", рече Дејвид Овен, економист на S&P Global Market Intelligence.
Порастот во регионот е сосема спротивен тек од случувањата во голем дел од светот, каде економиите забавуваат. Истовремено, цените на клучните суровини, од масло до бакар и пченица, паѓаат во последниве недели и синџирите за снабдување почнуваат да заздравуваат од пандемијата.
Притисокот на цените во регионот на Персискиот залив, кој е богат со нафта, и без тоа беше помал отколку на други места, благодарение делумно на ограничувањата на домашните трошоци за гориво во некои држави.
Сепак, ОАЕ и Саудиска Арабија мораа да издвојат милијарди долари за поддршка на граѓаните со ниски приходи. Во ОАЕ инпутните трошоци во ненафтената економија се зголемија и според S&P достигнаа највисоко ниво во последните 11 години.
Инфлацијата во Саудиска Арабија, државата која е на пат да биде овогодинешната најбрзо растечка економија во Г-20, забележа значајно месечно забавување.
Нивото на вработување во кралството се зголеми петти месец по ред, иако во август со побавно темпо отколку во јули.
За разлика од таквите резултати, кај ненафтените претпријатија на ОАЕ оптимизмот падна на најниско ниво во скоро една и пол години, делумно поради "зголемената несигурност за здравјето на глобалната економија", нотира S&P.
