Нов Зеланд ќе складира јаглерод диоксид под земја заради намалување на емисиите

Нов Зеланд ќе ги поттикне компаниите да зафаќаат и складираат јаглерод диоксид под земја, дозволувајќи им на тој начин да ги надоместат другите емисии на стакленички гасови. Сето тоа би ѝ помогнало на нацијата да постигне економија со нето нула емисија до 2050 година.

Законодавството за воспоставување рамка за зафаќање, искористување и складирање јаглерод ќе биде воведено годинава, рече министерот за климатски промени Сајмон Вотс денеска во Велингтон. Системот ЦЦУС (англ. CCUS-Carbon Capture, Utilisation and Storage) обично собира и складира јаглерод диоксид од извори како термални генератори или фабрики што согоруваат фосилни горива.

Во Нов Зеланд активностите на ЦЦУС ќе бидат вклучени во шемата за тргување со емисии, дозволувајќи им на компаниите да бараат кредити против други обврски поврзани со емисиите, рече Вотс.

„Бизнисите што зафаќаат и складираат јаглерод диоксид ќе бидат наградени. Тоа ќе помогне да се намалат обврските за емисиите за бизнисите во Нов Зеланд додека напредуваме кон економија со ниски емисии“, рече тој.

Рамката ЦЦУС ги исполнува препораките дадени во другиот план за намалување на емисиите на нацијата, објавен во декември. Официјалните лица проценуваат дека ЦЦУС ќе ги намали нето-емисиите на јаглерод диоксид за 1,9 мегатон во текот на следните десет години, односно до 2035 година.

Владата ќе бара секој ЦЦУС-проект да биде со темелна процена на прикладноста на местото за складирање и предложените операции, по што ќе следува континуирано следење на местото и процесот на инјектирање за да се осигури дека нема протекување.

Новата политика доаѓа откако владата се фокусира на серија зелени промени, вклучувајќи и олабавување на регулативите за емисиите за земјоделскиот сектор. Минатата година државата ги смени правилата за да ја забави стапката со која обработливото земјиште се претвора во шума заради неутрализирање на јаглеродниот диоксид.