Nasdaq 100 влезе во корекција, акциите на технолошките гиганти продолжија да паѓаат

Индексот Nasdaq 100 падна во територија на корекција денеска, 27.03, поради продлабочениот пад на акциите на технолошките гиганти кои го движеа „биковиот пазар“  поголемиот дел од изминатите три години.

Технолошкиот бенчмарк  падна за 1,24 отсто на 23.294 поени до моментот на пишување на овој текст, ​​со што индексот практично загуби  над 11 отсто од вредноста од пикот достигнат во октомври 2025-та. Ова е прв пат откако царините на американскиот претседател Доналд Трамп предизвикаа пад на акциите во април 2025 година, Nasdaq 100 да падне во техничка корекција, која се дефинира како пад од најмалку 10 отсто, но помалку од падот  на „мечкиниот пазар“ од 20 отсто. 

Bloomberg Mercury

 

Распродажбата на акциите од индексот доаѓа во време кога војната во Иран ја потресува довербата на инвеститорите, а во исто време големите технолошки компании се соочуваат со растечки скептицизам во врска со масовните трошоци за вештачка интелигенција (ВИ) и изгледите за тоа кога тие инвестиции ќе почнат да генерираат поголеми приноси.

„Реагираме на многу вести, а геополитичката ситуација засенува сè друго“, вели Џим Авад, висок менаџер во консултантската куќа „Клиарстед Адвајзорс“ (Clearstead Advisors).

„Мајкрософт“ (Microsoft Corp.) и „Мета“ (Meta Platforms Inc.) – две од компаниите што најмногу трошат за ВИ - се меѓу најголемите губитници во рамки на  Nasdaq 100 откако тој достигна максимум на 29 октомври. Оттогаш, „Мајкрософт“  падна за 34 отсто, додека „Мета“ за 29 отсто; матичната компанија на „Фејсбук“, исто така, неодамна губеше од пазарната вредност и  поради правни проблеми. 

Bloomberg

 

Сепак, не се само големите „трошаџии“  кои се погодени. „Енвидија“ (Nvidia Corp.), најголемиот корисник од оваа великодушност во трошењето за ВИ, падна за речиси 19 отсто од 29 октомври. Производителот на чипови се бори со стравувањата на инвеститорите дека неговиот растечки приход од продажбата на најважниот инпут за вештачката интелигенција нема да трае долго.

Во исто време, вознемиреноста за нарушувањата поврзани со вештачката интелигенција силно ги оптоварува производителите на софтвер, како и другите сектори. „Воркдеј“ (Workday Inc.), која произведува софтвер за човечки ресурси, и „Атласиан“ (Atlassian Corp.), сопственик на „Трело“(Trello), забележаа пад на акциите за повеќе од 40 отсто од 29 октомври досега.

И покрај тоа што предничеа во распродажбата, технолошките гиганти сè уште се позитивно оценети од Волстрит, при што се очекува растот на заработката да го надмине остатокот од компании што го сочинуваат индексот S&P 500 оваа година, а вреднувањата на акциите се попривлечни отколку што беа пред неколку месеци.

„Технолошките акции станаа многу евтини во релативен однос со сопствената историја , како и во релативен однос на пазарот“, вели Авад. „Кога пазарот ќе се сврти, ќе се сврти нагло и мислам дека ќе видите како овие акции навистина ќе се движат повисоко, бидејќи не само што се евтини и изгледаат привлечно, туку се и во најдобра позиција да напредуваат на долг рок, со оглед на нивниот раст и вештачката интелигенција.“

Таканаречените „Величествени седум“ – „Енвидија“, „Мајкрософт“, „Епл“,  „Алфабет“, „Амазон“, „Мета“ и „Тесла“ - се предвидува да остварат просечен раст на профитот од 19 отсто во 2026 година, според податоците собрани од „Блумберг Интелиџенс“. Спротивно на тоа, се очекува другите 493 компании во S&P 500 да имаат зголемување на заработката за 16 отсто.

Цената на Nasdaq 100 е 21 пати поголема од проценетата заработка на компаниите, што е намалување од врвот од 28 пати во октомври и мало намалување во однос на просекот во изминатата деценија.