Рекорди на европските берзи, се урива традицијата на „кучешки летни денови“

Европските берзи годинава ја побија традицијата за таканаречените „кучешки летни денови“ (од англиски: dog days of summer), како што се нарекува периодот кон крајот на јули и август, а кој вообичаено се карактеризира со помал обем на тргување, намалена пазарна активност и побавно движење на цените на берзите. Имено, главните берзански индекси во Европа уриваат рекорди, а слична е состојбата и на американскиот пазар, иако таму деновиве можеше да се забележи доза на воздржаност главно поради очекувањата за најновите податоци за инфлацијата и, следствено, можните чекори на Фед.

„Блумбер њуз“ објави дека европскиот пазар на акции работи со полна пареа и привлекува менаџери за пари што велат дека ова закрепнување ќе биде потрајно од само уште една краткорочна трговија. Без разлика дали станува збор за заработката, економскиот раст, анкетите за расположение или тековите кај фондовите, пазарните метрики низ целата табла покажуваат дека во тек е голема промена кај европските акции. Цените го одразуваат тоа. Индексот Stoxx Europe 600 растеше секој ден минатата недела, во својата најдолга низа од јуни.

„Постои дефинитивно возбуда за Европа“, рече Хелен Џуел, меѓународна главна инвестициска директорка за фундаментални акции во „Блекрок“ (BlackRock Inc). „Отпорноста на регионот го изненади пазарот и побарувачката останува многу поцврста отколку што се очекуваше.“

Долго време една од големите привлечности на европските акции беше тоа што беа екстремно евтини во споредба со американските. Но, со оглед на тоа што „Јуроп инк“ (Europe Inc) објави раст на заработката од 17 проценти, кој е најголем за четири години и најсилен економски замав од март 2023 година, повеќе стратези гледаат подобрени фундаментални фактори што го поткрепуваат оваа закрепнување.

„Со оглед на тоа што рамнотежата на ризиците е насочена кон заработката што ги надминува очекувањата за овој квартал, сметаме дека сега е време да се разгледаат и потенцијално да се додадат европски акции“, рече Марк Хефеле, главен инвестициски директор во „УБС Глобал велт менаџмент“ (UBS Global Wealth Management).

Последното истражување на Банката на Америка (Bank of America Corp) покажа дека нето два процента од менаџерите на фондови сега очекуваат европските акции да имаат подобри перформанси од конкурентите, во споредба со 15 проценти во јуни што очекуваа европските акции да имаат полоши перформанси. Анализата на „Ситигруп“ (Citigroup Inc) покажа дека Европа е единствениот голем регион што уживаше во значително подобрување на апетитот за ризик во последната недела од јули.

Според „Блумберг њуз“, тоа им овозможува на индексите на акции да продолжат со рекорден период во втората половина од 2026 година. Stoxx 600 се зголеми за 11 проценти оваа година, а регионалните референтни индекси, вклучувајќи ги германскиот DAX, францускиот CAC 40 и италијанскиот FTSE MIB, достигнуваат рекордни врвови.

Добивките се поттикнати и од поширок опсег на акции. Околу 75 проценти од составните делови на Stoxx 600 се тргуваат над нивниот 200-дневен подвижен просек, блиску до врвот на опсегот од изминатата деценија.

Знаците за заладување на непријателствата меѓу Вашингтон и Техеран го зголемија расположението, иако остануваат загриженостите за целосно повторно отворање на Ормускиот Теснец. Цените на нафтата се намалија од нивниот јулски врв, ублажувајќи ги грижите за инфлацијата.

„Расположението на инвеститорите беше попречено од геополитиката, но, како што тоа ќе се разјасни, ќе се ослободи поголема побарувачка за регионални акции“, рече Беата Мантеј, раководител на европската стратегија за акции во „Ситигруп“.

Друг двигател е промената на ставот кон сè што е поврзано со вештачката интелигенција. По наградувањето на масовните трошоци за технологија во првата фаза од растот, инвеститорите сега бараат сектори што се подготвени да имаат корист од тие трошоци, како и компании што ќе уживаат во посилни маржи на профит со усвојување на платформи за вештачка интелигенција. 

Европските фирми поврзани со полупроводници, како што се АСМЛ (ASML Holding NV) и „Инфинеон“ (Infineon Technologies AG), скокнаа за повеќе од 60 проценти во 2026 година и се меѓу најголемите двигатели на Stoxx 600.

Кошницата на Банката на Америка на европски усвојувачи на вештачка интелигенција, која ги опфаќа индустриската група АББ (ABB Ltd), заемодавецот „Стандард чартерд“ (Standard Chartered Plc) и енергетската компанија „Е.Он СЕ“ (E.On SE), порасна за 14 проценти оваа година, надминувајќи го растот од три проценти кај американските хиперскалери.

Во меѓувреме европските сектори фокусирани на економијата, вклучувајќи ги банките и индустриските стоки, се покажуваат како рај за инвеститорите што бараат технолошки алтернативи за време на дивите осцилации во трговијата со вештачка интелигенција. Индексот Stoxx 600 Banks е меѓу најголемите добитници оваа година, со раст од 22 проценти.

„Дури и ако замавот на вештачката интелигенција повторно се зголеми, инвеститорите се многу свесни за постојаната нестабилност во секторот, што значи дека технологијата сега е комплементарна, а не контрадикторна трговија“, рече Манти од „Сити“. „Инвеститорите ќе продолжат да поседуваат технологија, но исто така ќе додадат диверзификација преку циклични сектори, а тоа им користи на европските акции“.

Секое зголемување на каматните стапки од страна на Федералните резерви, на пример, би можело да ја наруши траекторијата за европските акции, според Аријана Хајате, менаџерка на фондови во „Едмонд де Ротшилд асет менаџмент“. Но таа додаде дека „насоката на движење останува генерално позитивна“.

За Даниел Мареј, заменик-главен инвестициски директор во „ЕФГ Асет менаџмент“ (EFG Asset Management), скептицизмот на инвеститорите кон европските акции отишол предалеку со оглед на изгледите за силен макроекономски раст и солидна заработка.

„Почнувате од место каде што има негативно позиционирање, но расположението се подобрува“, рече Мареј. „Тоа е доста убава комбинација.“

Како е во САД?

„Кучешките летни денови“ се чини дека годинава го заобиколија и американскиот пазар иако во вторникот имаше благ пад на главниот американски берзански индекс S&P 500. Трговците на Волстрит се воздржаа од поризични облози пред клучните податоци за инфлацијата, а акциите паднаа бидејќи неуспехот за договор за враќање на енергетските текови низ Ормускиот Теснец ги зголеми цените на нафтата.

Инвеститорите го очекуваа новиот индекс на потрошувачки цени, кој требаше да се објави подоцна во средата, а за кој се очекуваше дека ќе покаже ладење на притисоците поврзани со енергијата што се интензивираа во месеците веднаш по почетокот на војната меѓу САД и Иран. Тоа може да помогне да се ублажи дел од вознемиреноста во Федералните резерви откако тројца функционери во јули побараа зголемување на стапките.

Сепак, во средата фјучерсите на акциите напредуваа откако оптимистичките резултати од фирмите за инфраструктура на вештачка интелигенција го оживеаја апетитот за технолошки акции.

„Блумберг њуз“ информира дека фјучерс-договорите на индексот Nasdaq 100 пораснаа за 0,6 проценти, бидејќи „Корвејв“ (CoreWeave Inc) скокна за 18 проценти во претпазарното тргување поради продажба поголема од очекуваната, додека „Супер мајкро компјутер“ (Super Micro Computer Inc) доби 8,6 проценти откако нејзината прогноза за приходите ги надмина процените. Фјучерсите на S&P 500 пораснаа за 0,2 проценти. Трезорските обврзници останаа стабилни, а приносот на референтната 10-годишна обврзница изнесуваше 4,69 проценти.

„Ова е, веројатно, најдобрата средина за заработка во историјата на економијата. Мора да бидете навистина креативни за да смислите мечкин аргумент“, изјави Марк Хакет, главен пазарен стратег во „Нејшнвајд“ (Nationwide).

Всушност, силниот раст на заработките и солидната економија треба да му помогнат на S&P 500 да издржи умерено повисоки каматни стапки и предизвици со инфлацијата, според стратезите на „РБЦ Капитал“ (RBC Capital), кои го задржаа својот позитивен став за реперот во текот на следната година.

Најновите резултати беа поздравени од инвеститорите што бараат докази дека компаниите за инфраструктура на вештачка интелигенција можат да ги испорачаат заработките потребни за понатамошно поттикнување на технолошкиот раст.

„Извештаите од ’Коревејв‘ и ’Супер мајкро‘ се дополнителен доказ дека побарувачката за инфраструктура на вештачка интелигенција останува силна“, рече Флоријан Иелпо, раководител на макро во „Лобард Одиер инвестмент менаџерс“ (Lombard Odier Investment Managers).

Сепак, тој предупреди дека силната заработка не се претвора автоматски во повисоки вреднувања, особено со оглед на зголемените трошоци за финансирање.

                      

Со технологија против „летната летаргија“ во Лондон    Лондонската берза неодамна објави планови за лансирање на Лондонска берза 24 (LSE 24), ново место за тргување што работи 24/5 и ќе ја поддржи следната генерација на дигитално, алгоритамско и агентско тргување. LSE 24 е дизајниран да поддржува речиси континуирано тргување од понеделник до петок, давајќи им на глобалните инвеститори поголема флексибилност да реагираат на пазарните настани, да пристапат до ликвидност низ временските зони и да управуваат со ризикот. Алатката, која ќе биде изградена врз доверливата инфраструктура на финансискиот пазар на LSEG, ги надополнува постојните пазарни структури со зачувување на отпорноста и интегритетот на редовното работно време, а наедно ќе отвори нови можности за учество надвор од традиционалниот ден на тргување во Велика Британија. Ќе работи одделно од главниот пазар на Лондонската берза, кој ќе продолжи да работи со своето постојно работно време. LSE 24 ќе биде достапен за тестирање од страна на клиентите до крајот на 2026 година, а производите што се тргуваат на берзата (ETP) ќе бидат лансирани како прва класа на средства во првата половина од 2027 година, под услов да бидат одобрени од регулаторите. ETP се природна почетна точка, со оглед на воспоставената позиција на Лондон како водечки меѓународен ETP-центар и силната глобална побарувачка за производи што обезбедуваат ефикасна изложеност на пазарите низ светот. Центарот има намера да се потпре на елементи од централната книга на лимитирани нарачки и функционалноста за барање понуда за поддршка на транспарентноста на цените и ликвидноста на барање, со флексибилност за проширување во акции како следен чекор.

  

Со помош на Маргарита Киракосјан, Левин Стам, Џулиен Понтус, Лин Томасон и Сагарика Џаисингхани/Блумберг