Македонците вложуваат милиони во акции од странство

Се зголемува интересот меѓу македонските граѓани и фирми за инвестирање во хартии од вредност во странство, а најдобар показател за тоа е што во првото тримесечје од 2023 година вкупниот промет од тргување со акции и други хартии од вредност на странски пазари изнесувал околу 12,2 милиони евра. Притоа, тргувањето со акции доминира со учество од 81 процент во вкупниот промет на странски пазари, а по него следува прометот со обврзници со учество од 15 проценти. 

Кај прометот од тргување со хартии од вредност на странски пазари може да се забележи тренд на континуиран пораст во изминативе неколку години, кој подзабави во текот на минатата година, главно поради економската криза.     

„Во четвртиот квартал од 2022 година на странски пазари е реализиран промет од 12,8 милиони евра, што е намалување за 12,65 проценти во однос на третиот квартал, кога прометот на странски пазари преку домашни овластени учесници изнесуваше 14,7 милиони евра“, информира Комисијата за хартии од вредност во извештајот за четвртиот квартал од 2022 година. 

Поголем пад во тргувањето на домашниот отколку на странските пазари 

Во последните три месеци од 2022 година, прометот реализиран на странски пазари преку домашни овластени правни лица во вкупниот промет реализиран на домашниот и на странските пазари учествува со 33,6 проценти, односно во разгледуваниот период бележи намалување од 8,8 проценти наспроти претходниот квартал.

„Трендот на намалување на прометот на годишно ниво во однос на 2021 година е присутен како при тргувањето на домашниот пазар така и при тргувањето на странски пазари. Па, така, во 2022 година тргувањето на странски пазари бележи пад од незначителни 2,47 проценти, наспрема пад на прометот за 42,08 проценти на домашниот пазар. Како резултат на ваквите бројки на прометот, во 2022 година соодносот на тргување на странски пазари на годишно ниво спрема прометот реализиран на домашниот пазар е 34,53 наспрема 65,47 проценти“, објаснуваат од КХВ.

Во четвртиот квартал од 2022 година тргувањето со акции учествува со 65,06 проценти во вкупниот промет на странски пазари, наспрема 90 проценти во 2021 година. Покрај тргувањето со акции во 2022 година, 22,45 проценти е промет со други хартии од вредност, а 12,49 проценти е реализиран промет со обврзници на странски пазари.

„Шпаркасе банка“ лидер во тргувањето на странски пазари 

Инаку, битно е да се нагласи дека станува збор за промет реализиран на странски пазари преку овластените учесници на пазарот на капитал, и тоа три банки (Комерцијална банка, „НЛБ банка“, „Шпаркасе банка“) и една брокерска куќа („Инвестброкер“).

Во текот на 2022 година, „Шпаркасе банка“ првенствено била насочена кон тргување на странски пазари, па така оваа банка на годишна основа 89 проценти од прометот реализирала на странски пазари. „НЛБ банка“ 58 проценти од остварениот промет има направено на странски пазари, додека кај Комерцијална банка и „Инвестброкер“ овие бројки се пониски, односно првенствено се насочени кон тргување на домашниот пазар, па така кај Комерцијална банка 33 проценти и кај „Инвестброкер“ 23 проценти од остварениот промет е на странски пазари.