Заработките на повеќето технолошки гиганти се веќе објавени, а оваа група испорача поголема добивка отколку што очекуваше Волстрит. Лошата вест е што изгледите за повторување на ваквите резултати во четвртиот квартал не се добри.
„Епл“ (Apple), „Алфабет“ (Alphabet), „Мета“ (Meta Platforms) и „Тесла“ (Tesla) им дадоа причина на инвеститорите да се грижат за растот. Од придушената перспектива на „Епл“ за празничната сезона до слабите резултати од продажбата на облак-технологиите на „Алфабет“, компанијата родител на „Гугл“ (Google), лајтмотивот за оваа група беше претпазливост. „Мета“ предупреди дека е тешко да се предвиди што ќе се случи идната година, додека „Тесла“ изрази загриженост дека побарувачката за електрични автомобили почнува да слабее.
Тоа предизвикува загриженост кај инвеститорите, иако Nasdaq 100 скокна за 6,5 отсто минатата недела и ја забележа својата најдобра недела во една година.
„Ова се сведува на неуспех да се обезбедат насоки за иднината“, рече Скот Колјер, главен извршен директор на „Адвајзорс асет менаџмент“ (Advisors Asset Management). „Акциите на технолошките гиганти беа преценети до историски највисоки нивоа, така што инвеститорите беа разочарани кога тие компании потфрлија“.
Технолошките акции сега се на несигурно тло. Акциите на седумте најголеми технолошки компании паднаа во просек за околу девет отсто од највисоките нивоа во последните 52 недели. Само „Епл“ изгуби повеќе од 300 милијарди долари од пазарната вредност.
Падот на вредноста ги поевтини процените за пазарната вредност на компаниите, но акциите сè уште се скапи и тоа, со помал простор за сигурен раст во иднина, ги тера инвеститорите да се двоумат дали да платат висока цена за нив. Акциите на седумте најголеми компании во S&P 500 се вреднуваат во просек 31 пат повеќе од проектираната заработка, покажуваат податоците собрани од „Блумберг“. Тоа е речиси двојно повеќе од проектираната вредност на преостанатите 493 акции во индексот.
Bloomberg
Добивката на седумте најголеми т.н. компании со најголем раст во S&P 500 - „Епл“, „Мајкрософт“ (Microsoft), „Алфабет“, „Амазон“ (Amazon.com), „Енвидија“ (Nvidia), „Мета“ и „Тесла“ - е упатена кон раст од 50 отсто, според „Блумберг интелиџенс“. Иако „Тесла“ објави заработка помала од очекуваната, целата групација треба да го надмине зголемувањето од 36 проценти што беше предвидено пред почетокот на сезоната на заработка. „Енвидија“ ќе биде последната што ќе ги објави своите резултати на 21 ноември.
За Кит Лернер, еден од извршните директори на „Труис адвајзори“ (Truist Advisory Services), притисокот врз технолошките гиганти е знак дека корекцијата во S&P 500 е при крај, поставувајќи ја сцената за извонредни перформанси во последните два месеца од годината, кои обично се поволни за акциите.
„Сега сме во подобар сезонски период за пазарот, каматните стапки се стабилизираат, економските информации се измешани и има позитивни вести за вештачката интелигенција“, рече тој. „Со оглед на тоа што многу инвеститори заостануваат, делумно поради тоа што пропуштија да купат технолошки акции претходно годинава, мислиме дека може да видиме како некои инвеститори ќе ја бркаат технологијата до крајот на годината во страв да не бидат изоставени“.
Се разбира, технолошкиот сектор во S&P 500 сè уште има речиси 36 отсто премија во однос на индексот врз основа на моменталната цена на акциите на компаниите поделена со очекуваната идна вредност, според „Блумберг интелиџенс“.
Затоа Колјер вели дека сè уште гледа повеќе проблеми за поголемите акции со висок раст, кои можеби отишле предалеку. Неговата компанија „Адвајзорс асет менаџмент“ одлучи да купи акции на „Мајкрософт“, бидејќи верува дека големата инвестиција на компанијата во вештачката интелигенција ќе се исплати.
„Иако има многу возбуда околу вештачката интелигенција, не секоја компанија е подготвена за пазарот“, додаде тој. „Акциите може да се зголемат до крајот на годината, но не би рекол дека ова е целосно зелено светло за технолошките акции, па дури и за поширокиот пазар“.
Bloomberg
Откако S&P 500 забележа три последователни месечни пада, индексот ја забележа својата најдобра недела во 2023 година, кога Фед во средата сигнализираше дека зголемувањето на долгорочните приноси на американските државни обврзници ќе го намали поттикот за повторно зголемување на каматните стапки.
Сепак, битката меѓу технолошките акции и приносите на обврзниците би можела да продолжи во наредните недели, што може потенцијално да им наштети на менаџерите со пари кои штотуку одново ги откупија акциите на највредните американски компании со падот на приносите.
„Сè може да се промени во еден момент доколку дојде до економско или геополитичко поместување, што директно би влијаело на акциите што не ги вклучуваат вродените опасности од концентриран пазар во технолошките компании“, рече Макс Васерман, висок менаџер на портфолио во „Мирамар“ (Miramar Capital). „Затоа, бидете внимателни и немојте да бидете премногу биковски настроени за технолошките компании со најголема пазарна капитализација“.
.webp){kind=icon}
