Рекордни профити на гигантските европски банки, слатки приноси и од акциите

Иако во јуни Европската централна банка (ЕЦБ) ги намали каматните стапки за првпат по речиси пет години, профитабилноста на водечките европски банки достигна рекордно ниво. Вредноста на акциите го следеше примерот. Од почетокот на годината, акционерите на најпрофитабилните компании можат да се пофалат со принос од повеќе од 60 проценти (вклучувајќи ги и дивидендите).

Просечниот принос на капиталот за 110 банки што се под директен надзор од ЕЦБ достигна 10,1 проценти во вториот квартал. Ова е највисокото ниво откако ЕЦБ почна да ги објавува податоците пред речиси една деценија.

Бумот на профитот е резултат на повисоките каматни стапки, кои го поттикнаа растот на нето-приходите од камати. Нето-приходите од камати се зголемија во просек за 6,5 проценти на годишно ниво во вториот квартал. По двете намалувања од страна на ЕЦБ, банкарите очекуваат каматните приходи да се намалуваат со текот на времето, но сметаат дека тие треба да останат над нивоата постигнати пред зголемувањето на каматите.

Истовремено, според податоците на ЕЦБ, нето-каматната маржа за европските банки во просек изнесувала 1,61 процент, додека пред една година била 1,53 процент. Како што забележува ЕЦБ, разликите меѓу земјите се значителни. На пример, банките на францускиот пазар постигнуваат нето-каматна маржа од 0,9 проценти, додека во Латвија таа е 3,8 проценти. Во близината на врвот се рангирани и банките од Словенија, каде што просечната нето-каматна маржа во вториот квартал изнесуваше 3,6 проценти.

Жешки банкарски акции

Дека банкарите се ракуваат годинава е видливо и на берзата. Европскиот индекс за банкарскиот сектор (Euro Stoxx Banks) од почетокот на годината порасна за 28 проценти, со што го надмина општиот европски индекс Euro Stoxx 600 за 12 процентни поени. Проверивме колку биле профитабилни акциите на европските гигантски банки од почетокот на годината.

Повисоките каматни стапки придонесоа за 70-процентно зголемување на пазарната капитализација на големите европски банки од нивната најниска точка пред две години, во вкупна вредност од 440 милијарди евра, според аналитичарите на „Блумберг“. Банката со најголема капитализација во Европа, лондонска ХСБЦ, која достигнува 150 милијарди евра, од почетокот на годината на инвеститорите им донесе добри 17 проценти, ако се земе предвид дивидендата.

Со ова е само на работ од првите дваесет банки по вкупен принос за инвеститорите, каде што се земени предвид и растот на вредноста на акциите од почетокот на годината и исплатената дивиденда. Според овој показател, најпрофитабилна е британската „Национална вестминстерска банка“ (British National Westminster Bank), која на инвеститорите им донесе поврат од повеќе од 66 проценти. Следуваат италијанската „Уникредит“, која е шеста по пазарна капитализација, и шпанската „Каикса банк“ (CaixaBank), и двете им вратија над 60 проценти на акционерите.

И покрај високите вредности на акциите, рејтингот на аналитичарите за европските банки остана стабилен во последните три месеци. Според „Блумберг“, нивните препораки во просек се околу 3,9, при што пет укажуваат на купување, три на задржување и една означува препорака за продажба.

„Интеса Санпаоло“ (Intesa Sanpaolo) ја задржа својата позиција како најпопуларен кредитор меѓу аналитичарите, откако рејтингот на „Уникредит“ падна од 4,8 на 4,5 во февруари. Тие се и единствените банки за кои никој од аналитичарите не препорачува продажба на акции.

Запира циклусот на раст на профитот

Многу европски банки во втората половина од годинава се тргуваат блиску до највисоките нивоа во последните 15 години, но намалувањето на каматните стапки и зголемените трошоци се закануваат да го запрат двегодишниот циклус на раст на профитот. „Инерцијата на банките е доста долга, така што кога станува збор за работењето, во следните шест месеци сè ќе биде онака“, изјави Јуре Кватерник, претседател на управниот одбор на „Дежелна банка Словенија“, коментирјаќи го банкарското работење.

Сепак, тој нагласи дека банкарите се свесни дека во 2026 година ќе има сериозни деловни предизвици. „Банките пораснаа и повеќе не се толку штедливи, но прогнозите се јасни: приходите од камати драстично ќе се намалат“, оценува Кватерник.

Показателот за трошоците на капиталот (COE) на француската „Сосиете женерал“ за следната година е на високи 22 процента, според „Блумберг“. Следуваат „Сантандер“ (Santander), „Берклис“ (Barclays), „Стандард чартерд“ (Standard Chartered) и „Дојче банк“ (Deutsche Bank), кај кои овој показател е само малку под границата од 20 проценти. Медијаната на секторот е 14 проценти.

Беснеат битките за преземање банки

Можното преземање на германската „Комерцбанк“, кое планира да го спроведе италијанската банка „Уникредит“, моментално одекнува на европскиот банкарски пазар. Банката со седиште во Милано во понеделникот објави дека го зголемила својот удел во „Комерцбанк“ на околу 21 процент и поднесе барање за зголемување на тој удел на 29,9 проценти. Се вклучи и политиката. Италијанските политичари, предводени од премиерката Џорџа Мелони, се сè пофрустрирани од германското противење на можното преземање на „Комерцбанк“. Германската влада беше најголемиот акционер на „Комерцбанк“. Некои во Рим исто така изразија разочарување од главниот извршен директор на „Уникредит“, Андреа Орсел, поради тоа што бил премногу агресивен во неговата понуда за германската банка, според „Блумберг“, повикувајќи се на неофицијални извори. Тие се загрижени дека тоа може да влијае на односите меѓу двете земји.

Канцеларот Олаф Шолц во понеделникот ја засили реториката.

„Непријателските напади, непријателските преземања не се добра работа за банките, така што германската влада зазеде јасен став овде“, рече Шолц.

Сепак, се чини дека потенцијалното преземање има барем одредена поддршка во Германија. Франк Шефлер, член на комисијата за финансии и буџет на германскиот парламент, изјави за „Блумберг“ дека е „клучно“ Берлин да го намали својот удел во „Комерцбанк“.

Во моментов нема коментари за веста. Биди прв да коментира...

Остави коментар