Фјучерсите и акциите губат од вредноста, доларот расте

Американските фјучерси се намалија заедно со акциите во Европа, откако креаторите на политиките од најголемите централни банки во светот потврдија дека ќе продолжат со повисоки каматни стапки, дури и ако тоа се одрази врз растот на економиите. Приносите од државните средства пораснаа, а доларот зајакна.

S&P 500 и Nasdaq 100 се повлекоа за 1 отсто, односно за 1,2 отсто. Фјучерсите на Dow Jones Industrial Average паднаа за 0.8 проценти. Глобалниот индекс на акции падна на едномесечен минимум, а европските акции го продолжија минатонеделниот пад, при што поголем пад има кај технолошкиот сектор.

Индексот на долар на Блумберг се придвижува кон рекорд, бидејќи инвеститорите бараат засолниште од зголемената нестабилност. каматите од американските двегодишни обврзници се чувствителни на очекувањата околу политиката на ФЕД и во азиското тргување достигнаа 3,47 отсто, што е највисока вредност од глобалната финансиска криза. 10-годишниот принос, пак, се искачи на околу 3,10 проценти.

Глобалните пазари ги балансираат ризиците од инфлација и заканата од економско забавување што може да се влошат со агресивните зголемувања на стапките од страна на централните банки.

„Ние остануваме на нашиот став дека ФЕД ќе ги зголеми стапките за уште 100 базични поени до крајот на годината, со можност за повеќе доколку инфлацијата не забави во согласност со нашите прогнози“, рече Марк Хефл, главен инвестициски директор во UBS Global Wealth Management.

Обврзниците во Европа паднаа, при што 10-годишниот принос од германските обврзници е нешто над 1,5 отсто, откако неколку претставници на Европската централна банка (ЕЦБ) во текот на викендот ја истакнаа потребата да се дејствува посилно за да се укине рекордната инфлација. Еврото зајакна но, се задржа под паритетот со доларот.

Пауел во своето обраќање на симпозиумот на банкарите од американските централни банки ја означи веројатната потреба од рестриктивна монетарна политика уште некое време за да се спречи високата инфлација и предупреди да не се олабавуваат предвремено монетарните услови. Тој предупреди и на потенцијалот за економска удар врз домаќинствата и бизнисите.

Технолошките фирми прокнижија загуби за азиските берзи. Акциите на пазарите во развој се намалија, а мерачот на главните валути на земјите во развој падна најмногу во последните два месеци. Биткоинот се држи под нивото од 20.000 долари, што некои го гледаат како индикатор за подлабок пад на расположението на инвеститорите. Златото се повлече и загуби 0,6 проценти од својата вредност, па се тргуваше за 1.739 долари за унца. Но, нафтата оствари добивки поради ризиците од намалување на понудата. West Texas Intermediate порасна за 0.5 отсто, на 93,48 долари за барел.

Во меѓувреме, европските цени на природниот гас паднаа најмногу од март, откако Германија соопшти дека нејзините складишта за гас се полнат побрзо од планираното пред зимата.

Во моментов нема коментари за веста. Биди прв да коментира...

Остави коментар