Акциите силно се враќаат, индексот Dow Average ја проби границата од 50.000 поени

Акциите го забележаа својот најдобар ден од мај наваму, по распродажбата во технолошкиот сектор поттикната од загриженоста за милијардите долари што се вложуваат во развојот на вештачка интелигенција. Биткоинот скокна по пад од 50 отсто од својот врв. Среброто и златото исто така се вратија во позитива.

По наглиот пад на некои од најпреполнетите тргувања на Волстрит, S&P 500 порасна за 2 отсто. Dow Jones Industrial Average ја достигна границата од 50.000 поени. ЕТФ кој ги следи софтверските компании додаде 3,5 отсто. Индексот на производители на чипови скокна за 5,7 отсто, откако извршниот директор на „Енвидија“ (Nvidia Corp.), Џенсен Хуанг, изјави за „Си-Ен-Би-Си“ (CNBC) дека побарувачката за ВИ е „неверојатно висока“. Акциите на „Амазон“ (Amazon.com Inc.) паднаа за 5,6 отсто по најавата за планови за вложување 200 милијарди долари во оваа технологија.

Во епизода што потсетува на реакцијата на пазарите по појавата на ВИ-моделот на „ДипСик“ (DeepSeek) на почетокот на 2025 година, нова алатка за автоматизација од „Антропик“ (Anthropic PBC) предизвика распродажба на акции во секторите на софтверот, финансиските услуги и управувањето со средства, која на почетокот од неделава се прошири и на поширокиот пазар.

„Мој став: ова е претерано“, изјави Кени Полкари од „Слејт Стоун Велт“ (SlateStone Wealth). „Ова е момент кога треба да се задржи присебноста. Не е време за паника. За долгорочните инвеститори, ова е време за купување. Многу акции се на попуст.“
Според Марк Хакет од „Нејшнвајд“ (Nationwide), емоционалните распродажби поради намалување на задолженоста, какви што се случија на почетокот од неделава, можат да бидат „вознемирувачки“, но се „нормални и здрава калибрација“, кои нè потсетуваат на старата поговорка дека „дрвјата не растат до небо“,

„Во овој момент, макроекономската слика и состојбата со корпоративните добивки остануваат охрабрувачки, што укажува дека ова е повеќе промена во позиционирањето и техничка пауза, отколку пукнатина во фундаментите“, рече тој.

Откако неколку извештаи оваа недела ја истакнаа кревкоста на пазарот на труд, податоците покажаа дека довербата кај потрошувачите се подобрила и достигнала највисоко ниво во последните шест месеци.

Повеќе од 400 акции во S&P 500 забележаа раст. Верзијата на S&P 500 во која сите акции имаат исто влијание, без доминација на најголемите компании, достигна рекорд. Russell 2000 порасна за 3,6 отсто, додека Nasdaq 100 се зголеми за 2,15 отсто. Откако затвори над 40.000 поени во мај 2024 година, на Dow Average му беа потребни 630 дена за првпат да ја надмине границата од 50.000 поени, забележа Џефри Јејл Рубин од „Бирини Асошиејтс“ (Birinyi Associates Inc.).

Биткоинот ги поврати речиси сите загуби забележани за време на крипто-распродажбата во четвртокот и се искачи на околу 70.000 долари.

Приносот на 10-годишните американски државни обврзници порасна за три базични поени, на 4,21 отсто. Доларот ослабе за 0,4 отсто. Цените на нафтата благо се зголемија и покрај очигледното намалување на геополитичките ризици. Иран соопшти дека се согласил со САД да продолжат со индиректни разговори за деескалација на тензиите и избегнување воена конфронтација, при што Техеран го оцени првиот ден од разговорите како позитивен. 

Dow Average ја достигна границата од 50.000 поени

Bloomberg

„Инвеститорите ја прифаќаат ситуацијата и агресивно го купуваат падот на акциите“, изјави Хозе Торес од „Интерактив Брокерс“ (Interactive Brokers). „Основните ‘животински инстинкти’ им нудат можности на ловците на вредност да акумулираат акции, во услови на општо чувство на Волстрит дека распродажбата отиде предалеку.“

Неодамнешната распродажба на технолошките акции е причина за купување на падот и на поширокиот пазар, бидејќи изгледите за американската економија остануваат стабилни, смета Анвити Бахугуна од „НТАМ“ (Northern Trust Asset Management).

„Ова отстранува дел од надуеноста на пазарите“, рече таа. „Всушност гледаме дека примената на ВИ станува појасна. Од макро перспектива, ова не е момент за паника.“

Во меѓувреме, Џина Болвин вели дека новата пресвртница на Dow Average е „помалку за славење“, а „повеќе за потврда“.

Што значи тоа?

Пазарите се прилагодија на повисоки каматни стапки, побавен раст и глобална неизвесност — и сепак продолжија да растат, забележа претседателката на „Болвин велт“ (Bolvin Wealth Management Group).

„Тоа ни кажува дека довербата е реална и дека 2026 година ќе биде помалку фокусирана на Федералните резерви, а повеќе на фундаментите“, рече таа. „Со очекуван двоцифрен раст на добивките кај S&P 500, инвеститорите во акции веројатно ќе бидат наградени — но патот нема да биде лесен. Треба да се очекува волатилност.“

За инвеститорите, додаде таа, ова е потсетник да останат доследни и промислени: да се насочат кон квалитетни компании со силна способност за остварување добивки и да бидат подготвени за поголема ротација, а не за раст по права линија.

S&P 500 забележа најголем раст од мај наваму

Bloomberg

„На 50.000 поени, Dow Jones Industrial Average привлекува наслови, но тоа е потсетник дека пресвртниците стануваат погласни дури и кога се помалку значајни“, изјави Марк Хамрик од „Бенкрејт“ (Bankrate). „Порелевантен е S&P 500, кој е поширок индекс. Тој подобро ги одразува перформансите на големите американски компании и е поважен за приносите на многу инвеститори.“

Без разлика што ќе се случи денес, прашањата околу софтверските компании и профитабилноста на индустријата за ВИ нема да исчезнат, забележа Мет Мејли од „Милер Табак“ (Miller Tabak). Доколку технолошките акции повторно значително ослабнат во текот на следната една или две недели, во секторот и понатаму ќе постојат значајни ризици, додаде тој.

„За поширокиот пазар да оствари одржлив напредок, обновено учество на технолошкиот сектор најверојатно ќе биде клучно“, изјави Адам Тарнквист од „ЛПЛ Фајненшл“ (LPL Financial). „Очекуваме S&P 500 да има тешкотии да ја надмине границата од 7.000 поени без посилен придонес од технолошкиот сектор, особено од софтверските компании.“

Четири од најголемите американски технолошки компании заедно прогнозираат капитални расходи што ќе достигнат околу 650 милијарди долари во 2026 година, зачудувачки бран готовина наменет за нови центри за податоци и целата опрема што тие ја содржат. Планираните инвестиции на „Алфабет“ (Alphabet Inc.), „Амазон“ (Amazon), „Мета“ (Meta Platforms Inc.) и „Мајкрософт“ (Microsoft Corp.) претставуваат инвестициски бум без преседан во овој век.

Иако многу инвеститори стравуваат дека огромните трошоци можеби нема да се исплатат, сите тие инвестиции уште оваа година сигурно ќе донесат значителни приходи и добивки за компаниите што се добавувачи на „хиперскејлерите“, изјави Ед Јардени, основач на истоимената истражувачка компанија „Јардени рисрч“ (Yardeni Research).

Економијата, исто така, ќе добие поттик од големите капитални расходи, рече Јардени, додавајќи дека „се сомнева“ оти распродажбата на технолошките акции оваа недела е почеток на „технолошки крах“.

„Се сомневаме во тоа затоа што овојпат индустријата има многу повеќе профитабилни компании кои имаат корист од огромните капитални вложувања во ВИ-инфраструктура од страна на хиперскејлерите“, заклучи искусниот стратег од Волстрит.

Капиталните расходи на хиперскејлерите експлодираат

Проценките за 2026 година се базираат на средната вредност од дадените насоки („Мета“, „Алфабет“, „Амазон“ и „Мајкрософт“).

Bloomberg

Во меѓувреме, извршниот директор на „Енвидија“, Џенсен Хуанг, изјави за „Си-Ен-Би-Си“ дека изградбата на ВИ-инфраструктурата ќе продолжи во наредните седум до осум години.

„Вештачката интелигенција стана корисна и многу способна“, рече тој. „Нејзиното прифаќање стана неверојатно високо.“

Растот на добивките во четвртиот квартал кај компаниите вклучени во Nasdaq е на пат да достигне 20 отсто, што е за шест процентни поени повеќе од почетните проекции, забележа Улрике Хофман-Бурчарди од „УБС глобал“ (UBS Global Wealth Management). Иако инвеститорите ги преоценуваа вреднувањата на софтверските компании, повеќето фирми во овој сегмент остварија добивки што ги надминаа очекувањата за околу 6–7 отсто, при што консензусот за 2026 и 2027 година продолжува да се движи нагоре.

„Ги препознаваме ризиците што ја преобликуваат економијата на софтверскиот сектор и сметаме дека инвеститорите треба да одржуваат приближно 10 отсто изложеност кон софтвер во рамки на нивната поширока технолошка алокација“, рече таа.

„Продолжуваме да се залагаме за избалансирано позиционирање низ слоевите на овозможување, интелигенција и примена на синџирот на вредности на вештачката интелигенција и гледаме посебна вредност кај компаниите и секторите што можат да ја користат и применуваат вештачката интелигенција за подобрување на деловните резултати.“

Сепак, Хофман-Бурчарди го задржува ставот дека можностите на пазарот на акции оваа година треба да се прошират низ различни географии, сектори и структурни теми, при што инвеститорите со концентрирани позиции треба да ја диверзифицираат својата изложеност.

Вештачката интелигенција ќе остане структурен двигател на растот, но фокусот на инвеститорите се префрла од општ ентузијазам кон диференцирани деловни модели, капитална ефикасност и одржливи извори на приходи, изјави Боб Севиџ од „БНЈ“ (BNY).

Bloomberg

Прашањето овде не е дали ВИ ќе биде профитабилна, туку дали тие добивки се на повидок, смета Флоријан Јелпо од „Ломбард Одиер“ (Lombard Odier Asset Management).

„Оваа временска димензија претставува доминантна пазарна тема, а благо зголемување на избегнувањето ризик оваа недела всушност прикрива длабока секторска ротација, при што инвеститорите се оддалечуваат од акциите со најдобри резултати во изминатите квартали“, рече тој.

Стратегите на Банката на Америка (Bank of America Corp.), предводени од Мајкл Хартнет, наведоа дека американските акции со мала и средна пазарна капитализација се најдобрата опција во пресрет на среднорочните избори, додека технолошките гиганти ја губат својата привлечност.

Според нив, „агресивната интервенција“ на претседателот Доналд Трамп за намалување на цените на енергијата, здравствената заштита, кредитите, домувањето и електричната енергија врши притисок врз сектори како енергетските гиганти, фармацевтските компании, банките и високата технологија. Тоа ги прави помалите акции главни добитници од „бумот“ во пресрет на среднорочните избори во САД.

„Темата на ‘ротациски биковски пазар’ и натаму останува валидна“, изјави Крег Џонсон од „Пајпер Сендлер“ (Piper Sandler). „И понатаму даваме предност на релативната сила во сектори како енергија, материјали (неблагородни метали), индустрија, транспорт, здравство, банки и одбрани области од технологијата и дискреционата потрошувачка.“

Колку повеќе пазарот ротира, толку повеќе навистина станува „пазар за избирање акции“, додаде тој.

Проширување на растот
Верзијата на S&P 500 со еднакво учество на сите акции достигна историски максимум

Bloomberg

„По значајното повлекување, оваа недела сепак ја завршуваме со позитивна нота“, изјави Луис Навелиер од „Навелиер & Асошиејтс“ (Navellier & Associates). „Нема сомнеж дека ВИ ја зголемува продуктивноста, но истовремено и ги намалува работните места во корпоративна Америка.“

Според Навелиер, тоа ќе се преточи во намалување на каматните стапки од страна на Федерални резерви, што, се надева тој, ќе ја зголеми довербата на потрошувачите во наредните месеци.

Трговците се подготвуваат за недела што ќе донесе податоци за малопродажбата, задоцнет владин извештај за состојбата на американскиот пазар на труд во јануари, како и податоци за инфлацијата, што ќе понуди клучни информации за двојниот мандат на Федерални резерви: стабилна инфлација и раст на вработеноста.

Иако пазарите можеби ќе мора да поминат низ уште периоди на нервоза, Фед ќе ги намалат каматните стапки подоцна оваа година, што ќе создаде услови за понатамошен раст на пазарите, смета Џефри Роуч од „ЛПЛ Фајненшл“ (LPL Financial).

Февруарската волатилност е разбирлива, имајќи предвид дека јануари беше исклучително силен месец, а корекциите и повлекувањата се релативно чести токму во февруари, вели Кларк Белин од „Белветер Веалт“ (Bellwether Wealth).

„Биковскиот пазар не е мртов, но старее, и не нè изненадува што инвеститорите посветуваат поголемо внимание на корпоративните добивки и профитабилноста“, рече тој. „Нашата порака до инвеститорите е да останат опортунистички кога акциите паѓаат, но не нужно при секој пад. 2026 година и натаму треба да биде позитивна, со многу можности за купување акции по пониски цени.“

Што велат стратезите на Блумберг

„Силните технолошки добивки прикриваат една позагрижувачка појава: повратот на вложениот капитал кај хиперскејлерите почнува да опаѓа. Клучното прашање е дали станува збор само за краткотраен застој или за почеток на подолготраен тренд.“

— Татјана Дарије, макро стратег, „Маркетс Лајв“ (Markets Live).

Корпорациски вести:

– „Епл“ (Apple Inc.) се подготвува да им дозволи на апликации за вештачка интелигенција од други компании да работат со гласовни команди во CarPlay, велат извори запознаени со плановите. Овој чекор за првпат ќе им овозможи на корисниците да користат ВИ-четботи преку интерфејсот на возилото.

– „Тесла“ (Tesla Inc.) не чека да види дали амбицијата на Илон Маск за соларен капацитет од 100 гигавати е остварлива — компанијата веќе презема конкретни чекори. Според извори, „Тесла“ разгледува повеќе локации низ САД за започнување производство на соларни ќелии.

– „ЏП Морган“ (JPMorgan Chase & Co.), „Голдман Сакс“ (Goldman Sachs Group Inc.) и Банка на Америка (Bank of America Corp.) ги зголемиле фондовите за бонуси за банкари и трговци за најмалку 10 отсто, откако работењето имало корист од исклучително силна година за договори и пазарна активност.

– Операторот на берзи „Сибо Глобал Маркетс“ (Cboe Global Markets Inc.) планира да воведе опциски договори што ќе овозможат бинарни облози за исходот на одредени настани, со цел влез на брзорастечкиот пазар на предвидувања.

– „Ексон Мобил“ (Exxon Mobil Corp.) и „Шеврон“ (Chevron Corp.) ги насочуваат своите планови кон проширување на производството во земји поврзани со ОПЕК, вклучително и некои од геополитички најризичните региони во светот, додека понаметливата надворешна политика на Доналд Трамп им помага да склучуваат договори.

– Приоритетот на извршниот директор на „Коноко Филипс“ (ConocoPhillips) Рајан Ленс во Венецуела е да наплати милијарди долари што компанијата ги побарува речиси две децении по национализацијата на нејзините нафтени проекти, а не отворање нови бушотини.

– „Биоген“ (Biogen Inc.) прогнозираше добивка за 2026 година над очекувањата на Волстрит, сигнализирајќи дека агресивните мерки за намалување на трошоците го ублажуваат падот на продажбата од франшизата за мултиплекс склероза.

– „Филип Морис“ (Philip Morris International Inc.) пријави повисока добивка во четвртиот квартал, потпомогната од силната продажба на бездимни производи, како никотинските ќесички Зин.

– „Молина Хелткер“ (Molina Healthcare Inc.) прогнозираше добивка за 2026 година што е помалку од половина од очекувањата на Волстрит, поради повисоки медицински трошоци и недоволни државни надоместоци.

– „Роблокс“ (Roblox Corp.) објави дека бројот на корисници и резервациите во четвртиот квартал ги надминале очекувањата на аналитичарите, благодарение на серија хит-игри.

– „Карлајл Груп“ (Carlyle Group Inc.) ги надмина своите цели за приходи поврзани со надоместоци и раст на средствата во 2025 година, а истовремено објави квартални резултати над проценките на Волстрит.

– „Компас“ (Compass Inc.) не успеа привремено да ја блокира забраната на „Зилоу Груп“ (Zillow Group Inc.) за огласи што прво биле рекламирани на други платформи, откако судијата пресуди во корист на пребарувачот за недвижности.

– „Стелантис“ (Stellantis NV) ќе има трошоци поголеми од 22 милијарди евра (26 милијарди долари), главно поврзани со промена на стратегијата за електрични возила, што предизвика силен пад на акциите на сопственикот на брендовите Џип и Фијат.

– „БНП Париба“ (BNP Paribas SA) разгледува зголемување на бонусите за одделот за глобални пазари за околу 10 отсто, што би им донело на трговците едни од најголемите покачувања во банката по рекордната година за дивизијата.

– „Орстед“ (Ørsted A/S) планира повторно да воведе исплата на дивиденди и да ги зголеми инвестициите годинава, и покрај серијата скапи неуспеси во САД што ги засенија напорите за пресврт во работењето.

– Добивката на „Тата Стил“ (Tata Steel Ltd.) порасна осумкратно во третиот квартал, поттикната од силната побарувачка и производството во Индија, што ѝ помогна на компанијата да ги надмине растечките трошоци.

– „Бајт Денс“ (ByteDance Ltd.) и нејзината платформа Тикток добија предупредување од Европската Унија дека мора да го промени дизајнот на платформата, поради стравувања дека некои функции би можеле да му наштетат на физичкото и менталното здравје на корисниците.