Пристигна ворлдкоин, токенот на Сем Алтман

Беа потребни три години, повеќе дислокации на пазарот на дигитални средства и стотици милиони долари, но криптопроектот за скенирање на очното јаболко познат како ворлдкоин (Worldcoin) официјално профункционира.

„Ворлдкоин е обид за усогласување на глобално ниво“, се истакнува во изјавата на проектот за дигитален идентитет и криптоплаќања, чиј коосновач е главниот извршен директор на „Опен еј-ај“ (OpenAI), Сем Алтман. „Патувањето ќе биде предизвикувачко, а исходот е неизвесен“.

А пазарот на дигитални средства и пошироката технолошка индустрија претрпеа остри промени во годините по основањето на проектот. Од јуни 2021 година, кога „Блумберг“ првпат извести за новиот стартап на Алтман, цената на биткоинот се зголеми од околу 32.000 долари на над 67.000 долари, но се врати назад на помалку од 30.000 долари.

Некои од оригиналните поддржувачи на стартапот се повлекоа од криптопазарот, вклучувајќи ги и пропаднатиот хеџ-фонд „Три ароус капитал“ (Three Arrows Capital) и Сем Банкмен-Фрид, засрамениот поранешен извршен директор на банкротираната берза FTX. Секако, и вештачката интелигенција имаше влијание односно го узурпираше криптото и се наметна како најнов технолошки тренд - при што и самиот Алтман се појавува како една од највлијателните фигури на вештачката интелигенција.

Ворлдкоин, како и Алтман, ги поврзува световите на вештачката интелигенција и криптото. Овој проект користи мал уред, кој на англиски е наречен „orb“ (во превод вид сфера со енергија), за да ги скенира очните јаболка на луѓето со цел да генерира уникатен дигитален идентитет. Тој идентитет, или „ворлд ај-ди“ (wold ID), на носителoт му дава „доказ на личноста“, секако во јазикот на ворлдкоин. Алтман и неговите соосновачи велат дека новиот пристап за дигитална верификација е од суштинско значење во време кога вештачката интелигенција, повеќе од кога било, го отежнува процесот на утврдување на тоа што е создадено од луѓето, а што не.

Покрај лансирањето на блокчејнот наречен „Оп меинет“ (OP Mainnet), проектот исто така објави дека ќе има дистрибуција на криптотокенот ворлдкоин на оние што веќе имаат добиено „ворлд ај-ди“, а планирано е и да се прошират пријавите за скенирање на очното јаболко во повеќе земји.

Процесот не се одвиваше толку лесно цело време. Додека луѓето се пријавуваа, проектот беше критикуван дека се потпира на наводни измамнички и експлоататорски практики, а тоа се случи во Индонезија, Гана и Чиле. И покрај вревата околу вештачката интелигенција, многумина во индустријата се прашуваат дали секторот е потопен во преголема возбуда - на пример, академски труд неодамна забележа влошување на перформансите во ЧетГПТ (ChatGPT) со текот на времето.

Алтман изјави во интервју за „Блумберг њуз“ дека жестината за вештачката интелигенција помогнала да се генерира поголем ентузијазам околу ворлдкоин. „Има многу повеќе интерес, разбирање и возбуда, особено затоа што вештачката интелигенција стана поважен фактор во светот отколку кога го започнавме проектот“, рече тој.

Сегашното глобално регулаторно опкружување за крипто, обележено со репресии и тужби, претставува загатка и за проектот. Токенот на ворлдкоин (Worldcoin) моментално не е достапен во САД, каде што тензиите околу крипторегулацијата се интензивираа во последниве месеци. Алтман и неговиот коосновач Алекс Бланија објавија писмо во понеделникот во кое се наведува дека правилата се помалку јасни во САД.

„Ако се изразам нежно, очигледно постои голем недостиг од сигурност“, изјави Алтман за „Блумберг“. „Мислам дека тоа е голема штета“.

Алтман рече дека се надева дека САД ќе можат да дојдат до „рационално место“ во однос на крипторегулацијата. Тој претходно сведочеше пред Сенатот во мај, барајќи од Конгресот да ја регулира вештачката интелигенција.

 

Во моментов нема коментари за веста. Биди прв да коментира...

Остави коментар