.webp){kind=icon}
Криптовалутите паднаа во понеделникот поради поширокиот пад на апетитот за ризик на глобалните пазари. Цената на биткоинот падна за повеќе од 14 отсто, а второрангираниот етер го забележа својот најголем пад од 2021 година.
Повлекувањето на највредната криптовалута, биткоинот, на 50.900 долари во 7:20 часот во Лондон дојде по падот од 13,1 отсто минатата недела, најлошите перформанси по крахот на берзата FTX. Етерот изгуби повеќе од една петтина од својата вредност пред да достигне 2.286 долари. Повеќето од повредните криптовалути беа длабоко во црвено.
Падот доаѓа откако глобалната распродажба на акциите се интензивира, што ја одразува загриженоста за економските изгледи и прашањата за тоа дали големите инвестиции во вештачката интелигенција (ВИ) ќе ги исполнат помпезните ветувања. Геополитичките тензии растат на Блискиот Исток, зголемувајќи ја нервозата кај инвеститорите.
Американските берзански фондови (ЕТФ) за биткоин претрпеа најголем одлив во околу три месеци на 2 август. Едно од прашањата сега е дали овие инвестициски производи ќе привлечат купувачи што вообичаено инвестираат во средства кога неговата цена паѓа или ќе има уште поголеми излези од пазарот.
Bloomberg
Carry Trade
Дигиталните средства се една од жртвите на слабото тргување со јени бидејќи шпекулантите се приспособуваат на повисоките каматни стапки во Јапонија, според Хајден Хјуз, шеф за криптоинвестиции во „Евергрин“ (Evergreen Growth).
„Тие инвеститори исто така се борат против драстичното зголемување на трошоците за хеџинг поради нестабилноста на валутниот пар американски долар-јапонски јен“, рече Хјуз.
Биткоинот е погоден од голем број фактори откако достигна рекордно високо ниво од 73.798 долари во март. Тоа ги вклучува, меѓу другото, политичките случувања во Соединетите Американски Држави (САД), бидејќи прокрипто републиканецот Доналд Трамп и неговиот демократски противник, потпретседателката Камала Харис - која допрва треба да каже став за политиката за дигитални средства - ја заоструваат трката за функцијата претседател на државата.
Над пазарот виси и можноста за продажба на биткоини што се запленети од владите на неколку земји, како и ризикот од зголемена понуда на монети вратени на доверителите преку стечајна постапка.
Очекувања од Федералните резерви (Фед)
Трговците со обврзници ги зголемија облозите за намалување на каматните стапки во САД од септември за да ја поддржат економската експанзија. Изгледите за помалку рестриктивна монетарна политика всушност се „добра работа за криптовалутите“, според шефот на стратегија за дигитални средства на Фондстарт глобал адвајзорс (Fundstrat Global Advisors LLC), Шон Фарел.
Етерот има една од најслабите сесии во последните неколку години
Bloomberg
Повлекувањето на биткоинот во понеделникот го постави токенот на нивоа последен пат забележани во февруари. Етерот, пак, падна на цени забележани околу новогодишните празници. Слично на ситуацијата со биткоинот, исто така не е познато како ќе реагираат инвеститорите во новите американски етер ЕТФ-ови.
Џастин Д'Анетан, шеф на азиско-пацифичкиот деловен развој во „Кејрок“ (Keyrock), рече дека колапсот на криптото е донекаде поттикнат од етерот, што укажува на гласините на социјалните мрежи за институционална продажба на средства поврзани со етер.
