Падот на криптото го намалува богатството на семејството Трамп и неговите следбеници

Во вториот мандат на претседателот Доналд Трамп криптосредствата го трансформираа богатството на неговото семејство. Сега семејството Трамп (и неговите следбеници) минува низ дивата нестабилност вкоренета во дигиталните валути.

Вредноста на мемекоинот со брендот Трамп од август падна за околу една четвртина. Уделот на Ерик Трамп во потфатот за рударење биткоини изгуби приближно половина од својата вредност од својот врв. А акциите на компанијата за социјални медиуми на Трамп, која почна да складира биткоини оваа година, се движат блиску до најниското ниво на сите времиња.

Распродажбата е дел од поширок пад што уништи повеќе од еден билион долари вредност во светот на дигиталните средства. Богатството на семејството Трамп падна на околу 6,7 милијарди долари од 7,7 милијарди долари на почетокот на септември, според индексот на милијардери на „Блумберг“, а падот во голема мера е поврзан со нивното растечко портфолио на криптопотфати.

Тие вложувања вклучуваат сложени зделки што одат подалеку од директните облози за вредноста на дигиталните валути. Секојдневните инвеститори, кои имаат повеќе начини од кога било досега да инвестираат во проекти поврзани со Трамп, се соочуваат со поголема болка. На пример, секој шпекулант што го купил мемекоинот на Трамп во неговиот врв, откако беше најавен за време на викендот на инаугурацијата, ја изгубил речиси целата вредност на својата инвестиција до овој месец.

Ерик Трамп, вториот син на американскиот претседател, рече дека останува непоколеблив. Тој постојано ги повикува инвеститорите да го удвојат капиталот, дури и во услови на пад на криптопазарот.

„Каква одлична можност за купување“, наведе тој во изјава за „Блумберг њуз“. „Луѓето што купуваат при падови и ја прифаќаат нестабилноста ќе бидат крајните победници. Никогаш не сум бил пооптимистичен за иднината на криптовалутите и модернизацијата на финансискиот систем.“

 

Вистина е дека откако е создаден во 2009 година, биткоинот претрпел повеќекратни стрмни падови, за потоа да се искачува сè повисоко и повисоко со текот на времето. Но семејството Трамп има вграден тампон во своите криптофондови. Иако поседуваат токени и акции на компании поврзани со криптото што паѓаат, тие заработуваат пари на други начини од нивното дејствување во индустријата.

Земете ја за пример криптоплатформата на која ова семејство е соосновач – „Ворлд либерти фајненшл“ (World Liberty Financial): тие забележаа пад на вредноста на нивните акции во поврзаниот токен, но сè уште имаат право на дел од приходите од продажбата на токенот, без оглед на цените.

„Малопродажните инвеститори можат само да шпекулираат“, рече Џим Енџел, професор по финансии на Универзитетот „Џорџтаун“. „Семејството Трамп не само што може да шпекулира туку може и да создава токени, да ги продава и да заработува пари од тие трансакции.“

Ова е краток преглед на тоа како акциите на семејството Трамп поврзани со криптото го преживуваат падот.

„Трамп медија“: Загуба од 800 милиони долари

Акциите на „Трамп медија енд технолоџи груп“ (Trump Media & Technology Group Corp.), матичната компанија на платформата Трут соушл (Truth Social), во средата достигнаа рекордно ниско ниво. Барем дел од падот може да се објасни со лошо темпиран премин на криптовалути.

Вредноста на уделот на американскиот претседател во фирмата во септември падна за околу 800 милиони долари. Тој е најголемиот сопственик на компанијата, а неговиот удел во Труст го надгледува неговиот најстар син, Доналд Трамп Јуниор.

Bloomberg Mercury

 

„Трамп медија“, која е непрофитабилна, експериментира со неколку нови деловни линии, вклучувајќи ги и криптовалутите. Компанијата потроши околу две милијарди долари на биткоин и сродни хартии од вредност, вклучувајќи опции, според соопштението од јули. Резервата од околу 11.500 биткоини, купени кога цената на криптовалутата беше околу 115.000 долари, значи дека компанијата акумулирала загуба од околу 25 проценти од таа позиција.

Но компанијата почна да складира и помалку познат токен, наречен CRO, издаден од сингапурската компанија за криптоберза „Крипто.ком“ (Crypto.com). Резервата од токенот CRO на „Трамп медија“ вредеше околу 147 милиони долари на крајот на септември. Оттогаш CRO изгуби приближно половина од својата вредност.

„Трамп медија“ развива и други деловни линии со „Крипто.ком“. Двете компании планираат пазар за предвидување што ќе им овозможи на корисниците да се обложуваат на спорт и политика, наречен „Трут предикт“ (Truth Predict).

„Ворлд либерти фајненшл“: Загуба од речиси три милијарди долари

Водечкиот криптопроект на семејството Трамп, „Ворлд либерти фајненшл“, има свој токен наречен WLFI. Цената на тој токен падна од 26 центи на почетокот на септември на околу 15 центи.

Семејството Трамп поседува продавница со токени WLFI, кои во врвот имаа хартиена вредност од речиси шест милијарди долари. Денес тие вредат околу 3,15 милијарди долари. (Монетите не се вклучени во процената на семејството на Bloomberg Billionaires Index, бидејќи во моментов се заклучени и не можат да се тргуваат.)

Во август компанијата ѝ продаде дел од своите токени на мала јавно тргувана компанија наречена „Алт 5 сигма“ (Alt5 Sigma Corp). Продажбата се случи во погоден момент: „Ворлд либерти“ заработи 750 милиони долари во готовина и удел во акции.

Bloomberg Mercury

 

Инвеститорите во „Алт 5“ не се снајдоа толку добро. Акциите на „Алт 5“ изгубија околу 75 проценти од својата вредност откако беше објавена зделката.

Уделот на семејството Трамп во „Алт 5“, преку „Ворлд либерти“, се намали за околу 220 милиони долари. Но, членовите на семејството Трамп сепак излегоа како победници од договорот. Семејството доби околу 75 отсто од приходите од продажбата на токени на „Ворлд либерти“, што вкупно изнесуваше 500 милиони долари само од договорот со „Алт 5“, покажуваат пресметките на „Блумберг“. Ама, претседателското семејство заработи и околу 400 милиони долари од продажбата на токени WLFI уште пред договорот со „Алт 5“.

„Криптовалутите се тука за да останат“, наведе портпаролот на „Ворлд либерти фајненшл“ во соопштението за јавноста. „’Ворлд либерти фајненшл’ има долгорочна верба во брзорастечките технологии што ги поткрепуваат дигиталните средства, за кои веруваме дека радикално ќе ги подобрат финансиските услуги.“

 

„Американ биткоин“: Загуба од најмалку 330 милиони долари

Околу два месеца по инаугурацијата на Трамп, неговото семејство се фрли во уште еден нов криптопроект. Ерик и Доналд Трамп Јуниор соработуваа со криптокомпанијата „Хат 8“ (Hut 8 Corp.) за сложена серија трансакции, каде што „Хат 8“ обезбеди сопствена опрема за рударење биткоини во замена за мнозински удел во нова фирма, наречена „Американ биткоин“ (American Bitcoin Corp).

Ерик Трамп поседува околу 7,5 проценти од „Американ биткоин“, чии акции сега се тргуваат на Nasdaq под тикерот ABTC. Доналд Трамп Јуниор поседува помал удел, кој не е точно познат.

Акциите на ABTC достигнаа врв од 9,31 долари на почетокот на септември, со што уделот на Ерик Трамп вредеше околу 630 милиони долари. Оттогаш тие се намалија за повеќе од половина, бришејќи повеќе од 300 милиони долари од семејното богатство. Трансакцијата сè уште претставува еден од најјасните примери за тоа како семејството Трамп генерираше стотици милиони ново криптобогатство од релативно неодамнешни потфати.

Инвеститор што купил акции на ABTC кога тие станале јавни ќе се соочи со загуба од 45 проценти. Портпаролот на „Американ биткоин“ не одговори на барањата за коментар.

Мемекоин Трамп: Загуба од речиси 120 милиони долари, отклучени токени од 220 милиони долари

Мемкоинот на Трамп веќе падна откако беше објавен за време на викендот на претседателската инаугурација. Но од крајот на август изгуби уште околу 25 проценти од својата вредност.

Bloomberg Mercury

 

Не се знае големината на семејниот удел во монетата. „Гонтлет“ (Gauntlet), фирма за моделирање ризик, откри дека дигиталните паричници поврзани со создавањето на мемекоинот поседувале речиси 17 милиони токени неколку месеци по нејзиното лансирање, а уште 17 милиони биле префрлени на криптоберзи од тие паричници. Во јули беа отклучени уште 90 милиони токени. Индексот на милијардери на „Блумберг“ му припишува на семејството Трамп 40 отсто од вкупниот износ врз основа на сопственичкиот удел во „Ворлд либерти фајненшл“.
Овие монети вредат околу 310 милиони долари по тековните цени, што е пад од околу 117 милиони долари од крајот на август.

Но семејството Трамп доживеа огромен пораст на своите удели во монети, според пресметките на индексот. Некои од токените што ги поседуваат инсајдерите и креаторите на монетата се „заклучени“ и не се тргуваат, но на нив се стекнува право во текот на три години.

При настанот на стекнување такви права во јули за инсајдерите беа отклучени речиси 90 милиони повеќе токени на Трамп, според фирмата за криптоистражување „Месари“ (Messari), од кои околу 40 проценти му се припишуваат на семејството Трамп според индексот за богатство на „Блумберг“.

Дополнителните монети вредат околу 220 милиони долари. Тоа значи дека вредноста на вкупните средства што ги поседува семејството се зголемила. Останува нејасно дали семејството Трамп продало монети од јули досега.